Advertisements

GOBIERNU KE RENOBA KOMUNIKASHON KU KOMUNIDAT NA UN MANERA FUNDAMENTAL

GOBIERNU KE RENOBA KOMUNIKASHON KU KOMUNIDAT NA UN MANERA FUNDAMENTAL

 

Willemstad – Gobièrnu di Kòrsou a disidí for di desèmber 2017 pa inisiá un trayekto pa renobá e manera di komuniká ku komunidat na un manera fundamental. Esei a base di vários krítika riba su manera di komuniká i informá nos komunidat riba e desaroyonan gubernamental. Ministerio di Asuntunan General a prepará proposishonnan den e kuadro ei, ku tambe ta enserá e eskoho pa yega na un Direktor Interino pa e Direktorado di Komunikashon i Informashon di Gobièrnu di Kòrsou (mihó konosí komo DCV). Konseho di Minister a aprobá un trayekto di headhunting pa por haña un persona kualifiká pa guia e trayekto di renobashon di komunikashon i duna guia temporal na e Direktorado konserní.

Sr. Maharo Isenia a keda aserká for di luna di yüni 2018 dor di e Sekretario General di e Ministerio di Asuntunan General komo un di e kuater (4) posibel kandidato pa e posishon interino, i finalmente pa medio di evaluashon a base di un profil i e deskripshon di e tareanan spesífiko, a keda eskohí pa e ròl aki den luna di ougùstùs.

Gobièrnu di Kòrsou mas ku klaro no ta para ketu solamente riba e ekspertisio i preparashon di e kandidatonan, pero ta para ketu tambe riba aspektonan manera profeshonalismo i integridat. Sr. Isenia di febrüari 2011 te ku desèmber 2012, ya a keda nombrá kaba komo Direktor Interino dje mesun Direktorado i ta basta konosí ku e la ehersé un bon trabou ku a duna resultadonan positivo i empaketante. Su tarea di e tempu ei tabata pa lanta un organisashon ful di nobo dor di krea strategia i maneho di komunikashon i a base di esaki invertí den lokalidat i vários aparato pa Gobièrnu por a komuniká efektivamente. Tur esaki banda di e echo ku mester a krea un identidat nobo pa Gobièrnu di Kòrsou (Huisstijl), koreo nan elektróniko nobo (nòmber.fam@gobiernu.cw) i tambe e.o. kontakto ku medionan pa medio di kontratonan di tèrmino largu pa asina baha gastu.

Otro logronan di e Direktorado den e temporada ei ta enserá invershonnan den fasilidatnan di “Video Conference” pa por komuniká internashonal fásil i barata, i tambe desaroyá e funshon i fasilidatnan di komunikashon den kaso di krísis. Nèt promé ku Sr. Isenia a asumí e ròl komo Direktor Interino na 2011, Kòrsou a konosé e fenómeno di áwaseru fuerte en konekshon ku tormenta tropikal Tomas. Gobièrnu den su análisis di e tempu ei a bin realisá ku na momento ku tin un kalamidat grandi, manera a sosodé ku Tomas, e no ta disponé di un sistema pa por keda den aire pa komuniká ku komunidat dje desaroyonan riba e isla. P’esei a hasi invershonnan den un aparato mobil di komunikashon espesialmente kreá pa komunikashon durante kalamidat i un antèna (mihó konosí komo Live-Link) pa por bai “live” for di kualke lokashon ku e por ta situá. Miéntras tantu, e mesun antèna aki ta keda uzá tambe pa por hasi grabashonnan “live” for di Fòrt Amsterdam pa por pasa na televishonnan.

Gobièrnu di e tempu ei a invertí tambe den un kanal di informashon propio ku a bin keda yamá kanal 84. Pa por a logra esaki, mester a hasi un invershon basta grandi den e aparatonan ku por a hasi esaki posibel. Ta trata di algun kámara, un studio kompleto kaminda por a dirigí e kanal i un studio kaminda e grabashonnan por a tuma lugá (chèk e potrètnan). Esaki a kristalisá ku aprobashon di konseho di minister, i bou di ekspertisio di esun tiki ekspertonan lokal ku por a ehersé e trabou aki por a kristalisá e proyekto aki ku ta un materia basta spesialisá.

Na 2014 (2 aña despues ku Sr. Isenia a sali for di e Direktorado), minister presidènt di e tempu ei a laga SOAB hasi un investigashon riba e proseduranan atministrativo, i a bin konstatá ku, meskos ku ta e kaso den otro departamento, no ta tur prosedura a kana sublime. Gobièrnunan di turno a bin ta mehorá esaki mas i mas ku tempu, pasó esaki ta tuma tempu pa tur hende por dominá e prosesonan atministrativo a base di lei na un manera detayá.

Esaki pa Gobièrnu no tabata motibu pa no kontratá señor Isenia pa e posishon aki atrobe na aña 2018. Ta konsiderá ku no ta hustu ku despues di 2 aña ku sr. Isenia no tabata traha den e Direktorado mas, i vários otro direktor interino mientrastantu a guia e servisio, a laga hasi un investigashon. A pidi Sr. Isenia diferente informashon ku e no tabata disponé di dje, i tabata ke a pone e kulpa ku algun aparato ku no por a haña den e Direktorado mas na 2014 tambe riba su persona, siendo a bin haña vários bèk despues. Ademas, pa e tempu anterior ku sr. Isenia tabata Direktor Interino, hopi di e regla i prosedura no tabata bon definí komo ku e aparato Gubernamental mester a keda konstruí kompletamente di nobo for di 10-10-10. Adishonalmente, tur kompra ku a bin ta hasi ta konforme desishon di Konseho di Minister i tambe konforme e Plan di Gobernashon di e tempu ei.

Ke men pa konkluí, e desishon di Gobièrnu pa kontratá Sr. Isenia no a keda tumá pa akomodá su persona polítikamente, si no pa su kualifikashonnan. Gobièrnu di Kòrsou a pèrkurá pa buska un kandidato temporalmente ku ta kumpli ku e profil ku por inová i guia e Direktorado di Komunikashon i Informashon dor di tene kuenta tambe ku e aspekto di profeshonalismo i integridat. Señor Isenia, ku ta amplio konosí pa e ekspertisio aki den e aparato Gubernamental, a sali e mihó kandidato pa e posishon aki i e komunidat lo bai nota esaki pronto.

 

Advertisements
%d bloggers like this: