Advertisements
window.dataLayer = window.dataLayer || []; function gtag(){dataLayer.push(arguments);} gtag('js', new Date()); gtag('config', 'UA-83616463-1');

Karta Charles Cooper – MFK: Komo Minister di Desaroyo Ekonómiko ku ta firma asina tantu MOU, frakshon di MFK kier sa kon ta para ku e proyekto di mil (1000) baka pa Kòrsou.

Na:      Minister di Desaroyo Ekonómiko

Señor I.S. Martina

PRESENTE

 

Willemstad, 29 di ougùstùs 2018

Tópiko: Komo Minister di Desaroyo Ekonómiko ku ta firma asina tantu MOU, frakshon di MFK kier sa kon ta para ku e proyekto di mil (1000) baka pa Kòrsou.

 

Honorabel  Sr. Minister Martina,

Frakshon di MFK ta preokupá ku e deterioro di ekonomia di Kòrsou i nos no a mira ku Gabinete Rhuggenaath ( PAR-MAN-PIN), ta hasi muchu den e último 15 lunanan pa a reaktiva nos ekonomia, miéntras ku ta bo persona ta responsabel pa kartera di ekonomia.

Ta parse ku Minister di ekonomia a kombertí su mes den un minister ku e kapasidat di solamente firma MOU (Memorandum of Understanding), pero esakinan sin muchu “understanding”, na lugá di un minister ku tin e kapasidat di desaroyá ekonomia di un forma ku Kòrsou por kosecha fruta for di esaki i yunan di tera mira kuponan di trabou kuminsá habri pa nan por laborá i asina saka nos for di e problemanan ku nos ta bibando.

Ta fresku den nos memoria tur e MOU nan ku minister Martina a firma, pero te ainda ningun di nan a resultá den un proyekto konkreto pa kontribuí na desaroyo di nos ekonomia i nos ta menshoná algun di MOU nan di mas resien;

 

  • MOU Curoil ku KTK
  • MOU entre Kòrsou i Medellin
  • MOU ku TNO
  • MOU ku GZE
  • MOU ku Republika Dominicana
  • MOU di Baka
  • MOU entre Curoil i Cupet
  • MOU Gobierno ku Qredits

 

For di e lista largu di MOU di Minister Martina, nos a skohe esun di mil (1000) baka, di kual ku masha fanfare Minister a anunsiá algun luna pasa ku pronto ta bin un proyekto krioyo di mil baka pa Kòrsou.

Lamentablemente nos ta konstatá ku e proyekto aki no a avansá i hasta nos a komprondé ku e desaroyadó di e proyekto a pone un “deadline” pa gobièrnu di Kòrsou. Ku si den e luna aki di ougùstùs 2018, nan no tende nada di gobièrnu, nan lo legumai e proyekto aki.

Nos ta lamentá ku kada bes Minister Martina ta benta un kos den laira, firma MOU i despues ta resultá ku e kos ta mas mecha ku sebu. Kòrsou no ta sirbí ku firmamentu di MOU, sino ku echonan konkreto ku lo por krea kuponan di trabou pa pueblo mes por pone pan riba mesa pa su famianan.

Frakshon di MFK a hasi su hùiswèrk riba un posibel proyekto asina aki pa Kòrsou i loke a pone nos buska detayenan aklaratorio, di kual bo persona mester duna klaridat i esaki a kondusí nos pa hasi uso di artíkulo 96 di Reglamentu di Orden i  nos ta hasi minister Martina e siguiente preguntanan;

 

  1. Minister por informá Parlamento kua ta e status di e proyekto di mil baka pa Kòrsou?

 

  1. Minister ta na altura ku kada baka mester bebe alrededor di 70 pa 110 liter di awa pa dia?

 

  1. A pensa di for di unda ta haña a kantidat di awa aki pa dia pa e mil bakanan por bebe tur dia?

 

  1. Minister por informá Parlamento kiko presis Gobièrnu mester a hasi òf kumpli kuné pa e proyekto aki bira faktibel na Kòrsou?

 

  1. Minister ta na altura ku un baka (ku tin ku produsí 250Kg di karni) tin ku kome alrededor di 2.5 % di su peso na kuminda seku pa dia. Esaki ta solamente kuminda seku manera “hooi”. Huntu ku otro nutrimentu òf kuminda konsentrá, esaki ta nifiká ku un baka por kome 25kg na kuminda tur dia?

 

  1. A pensa di unda ta haña e kuminda aki pa e mil bakanan aki tur dia?

 

  1. Tin dos forma pa kria baka,esun promé ta bakanan ku ta kana liber i komo yerba ku ta planta riba e tereno. Esaki ta rekerí mas o ménos 1.8 ha di tereno pa kada baka. Esaki no ta rekerí importashon di kuminda, pasobra ta planta esaki aki mes. A menshoná un sorto di yerba di Israel ku ta usa awa salu. Esaki no ta rekomendabel pasobra e salu lo penetrá den nos sub suela i daña e kalidat di nos sub suela. Kiko ta Minister su pensamentu riba e forma di kria baka aki?

 

  1. Krio será. Esaki ta rekerí 40-50 ha di tereno. Anto por importá e kuminda p.e. “Maralfalfa Grass” (Cuba òf México). Kiko ta Minister su pensamentu riba e forma di kria baka aki?

 

  1. E pregunta importante na Minister ta kua di e dos modalidatnan aki a keda akordá ku lo bai implementá den e proyekto aki?

 

  1. Minister por informá Parlamento kon lo bai atendé ku e shushi ku e mil bakanan aki lo produsí pa dia?

 

  1. Tin tur indikashon ku no tin sufisiente agrikultor ku por dil ku ni e shushi aktual di galiña?

 

  1. Na momentu ku sushi di e bakanan bin aserka e mèst mester para na solo pa por saka e gas Metano i Amonia. Ta bin aserka e ora ei ku mester di mas tereno pa e proseso, Minister por splika kon ta bai atendé ku e problema aki?

 

 

  1. Minister por informá Parlamento, kua ta e plan ku tin pa train personal ku tin ku bai traha den e sektor aki?

 

  1. Kon ta atendé ku impuesto di importashon pa eventual kuminda ku lo kumpra den eksterior pa e bakanan por kome?

 

  1. Lo hasi un eksonerashon pa kriadónan aktual tambe por haña kuminda di bestia mas barata?

 

  1. Minister por informá Parlamento kon nos abattoir lo bai atendé ku e proyekto aki?

 

  1. Minister ta na altura ku e desaroyadó nan di e proyekto aki a pone un “deadline” pa gobièrnu kumpli ku su parti i pa nan tende algu den luna di ougùstùs 2018?

 

  1. Minister por informá Parlamento si bèrdat gobièrnu den su totalidat ta para tras di e proyekto aki?

 

  1. Den ki forma gobiernu ta i lo bai sostené e kriadó di bestia ku tin añanan largu ta kria bestia na Kòrsou kaba?

 

  1. Minister por informá Parlamento si e MOU aki ta unu BINDING òf un ku ta NON-BINDING?

 

Rekordando Minister Martina riba e obligashon ku ta ankra den nos Areglo di Estado pa gobièrnu duna miembronan di Parlamento tur informashon rekirí i tambe ku den e protokòl firma entre Parlamento i Gobièrnu, ku kontestanan riba preguntanan hasi dor di miembronan di Parlamento mester wòrdu kontesta no mas tardá ku denter di 2 luna, nos ta keda en espera di Minister su kontestanan.

Atentamente,

Ing. Charles Cooper

Miembro di Parlamento

Pa frakshon di MFK

.

.

 

.

Advertisements

Skibi bo komentario / Opinion

This site uses Akismet to reduce spam. Learn how your comment data is processed.

error: Content is protected !!
%d bloggers like this: