Advertisements

Programa di Urgensia i Reda Sosial ta entregá sertifikado na 85 kursista

Programa di Urgensia i Reda Sosial ta entregá sertifikado na 85 kursista

 

WILLEMSTAD Despues di a sigui diferente kurso den kuadro di Programa di Urgensia, ayera un kantidat di 85 persona a risibí nan sertifikado den un seremonia ameno. Minister di desaroyo sosial, laboral i bienestar, Hensley Koeiman, a dirigí su mes na e kursistanan ekspresando kon kontentu e ta di mira e kursistanan trahando riba nan desaroyo personal.

Ya ta konosí ku Reda Sosial sa organisá kursonan den diferente barionan di Kòrsou durante aña. Pero e aña aki a skohe e kuater barionan di Programa di Urgensia pa e kursonan aki i asina sostené e inisiativa di gobièrnu di Kòrsou. Di e manera aki tambe Programa di Urgensia ta sigui traha i brinda oportunidat na famianan di ménos rekurso riba nos isla.

Kada bario a haña oportunidat di organisá un òf mas kurso, dependiendo di e nesesidat di e bario mes. Un kantidat máksimo di 20 kursista por a sigui kada un di e kursonan. E kursonan ta kurso di kapasitashon ku e meta pa yuda e kursistanan haña un trabou den futuro òf kisas traha independientemente. Ta trata aki di kursonan di Ingles, Hulandes, bankèt, presupuesto, uña akríliko  i manikür/pedikür. Na e momentunan aki kursonan di kòmpiuter ta andando i lo finalisá pronto.

E kursistanan ta sumamente satisfecho i por mira kon nan a desaroyá durante e periodo di e kursonan. Nan ta entusiasmá pa buska trabou i Programa di Urgensia ta komprometé pa yuda nan den esaki.

Programa di Urgensia ta un programa di akshon dirigí riba mehorashon di e situashon di biba i traha pa pueblo di Kòrsou. E programa aki aktualmente ta keda implementá den e kuater barionan, Montaña, Buena Vista, Otrobanda i Barber. E ta un inisiativa di Gabinete Rhuggenaath.

Riba e fotonan athunto, por mira e kursistanan ku a sigui e kurso ku éksito i a risibí nan sertifikado ayera serka nan dosentenan i direktor di Reda Sosial.

 

Advertisements
%d bloggers like this: