Advertisements
window.dataLayer = window.dataLayer || []; function gtag(){dataLayer.push(arguments);} gtag('js', new Date()); gtag('config', 'UA-83616463-1');

Gabinete Rhuggenaath ta garantisá ku e plannan di Fundashon Skol Humanista na Papiamentu ta kristalisá

Gabinete Rhuggenaath ta garantisá ku e plannan di Fundashon Skol Humanista na Papiamentu ta kristalisá

WILLEMSTAD – Minister di Enseñansa, Siensia, Kultura i Deporte, sra. drs. Marilyn Alcalá-Wallé, ta kontinuá su trabounan pa garantisá ku Papiamentu ta haña e atenshon nesesario ku e ta meresé i logra ku den trayektonan paralelo ta reaktivá trabounan di importansia ku ta òf tin ku tuma lugá pa promové nos idioma materno Papiamentu.

Minister Marilyn Alcalá-Wallé tin un seri di trayekto paralelo ta kanando pa logra reaktivá e trabounan ku ya pa algun aña ta en espera pa kontinuá:

  • Un di e trayektonan aki ta pa garantisá kon palabranan nobo di Papiamentu ta ser skirbí ofisial, riba rekomendashon di Fundashon pa Planifikashon di Idioma (L.B. 8 di desèmber 2008, P.B. 2007 no 20).

  • E trayekto di pone Papiamentu riba lista di Herensia Intangibel di UNESCO.

  • E trayekto di konsultá ku vèlt riba MANEHO di IDIOMA (yüni 2018).

  • Resientemente Gobièrnu di Kòrsou a sera un Akuerdo di Koperashon ku Gobièrnu di Aruba, Gabinete Wever-Croes pa asina krea un mihó infrastruktura i maneho riba nos idioma Papiamentu i tambe pa huntu nos promové esaki den e.o. enseñansa.

  • Resientemente Konseho di Minister di Kòrsou a tuma e desishon pa re-aloká fondonan nesesario riba presupuesto di Ministerio di Enseñansa, Siensia, Kultura i Deporte pa Fundashon Skol Humanista na Papiamentu pa den forma responsabel, por ehekutá e proyekto históriko kual ta trata ekspanshon di SKAIH ku un skol Pre-Universitario HAVO/VWO Bilingual (Papiamentu-Ingles) ku a start e aña eskolar nobo aki 2018-2019.

Atraves di e proyekto bilingual aki di SKAIH Pre-Universitario a pone nos idioma materno riba mapa mundial, kaminda diferente universidatnan ta hasiendo investigashon riba e area bilingual di Papiamentu i Ingles.

Minister di Enseñansa, Siensia, Kultura i Deporte, drs. Marilyn Alcalá Wallé i su ministerio ta realisá ku riba tereno di Papiamentu tin hopi trabou pa logra den termino kòrtiku riba e temanan: “Maneho di Idioma, Infrastruktura di Idioma, Papiamentu den nos Enseñansa, Investigashon riba Papiamentu riba nivel avansá”.

#HUNTU ta e formulá pa agilisá e trabounan aki i ku plaser Minister Alcalá-Wallé ta anunsiá ku e ponementu di e fondonan finansiero aki disponibel pa Fundashon Skol Humanista na Papiamentu ta yuda promové positivamente e dominio di nos idioma materno komo idioma di instrukshon.

Advertisements

Skibi bo komentario / Opinion

This site uses Akismet to reduce spam. Learn how your comment data is processed.

error: Content is protected !!
%d bloggers like this: