Advertisements

DI YANÜARI PA YÜLI 2018: MEO YA A PROSESÁ UN TOTAL DI 2.373 PÈRMIT EKONÓMIKO

DI YANÜARI PA YÜLI 2018: MEO YA A PROSESÁ UN TOTAL DI 2.373 PÈRMIT EKONÓMIKO

Geplaatst op 27 Ougùstùs 2018 dor di Ministerio di Desaroyo Ekonómiko

WILLEMSTAD- Ministerio di Desaroyo Ekonómiko (MEO) den kuadro di transparensia na klientenan i eliminashon di ‘red tape’ kier informá pa medio di esaki e kantidat total di pèrmitnan ekonómiko ku a keda prosesá te ku luna di yüli di e aña aki.

Pa lei Ministerio di Desaroyo Ekonómiko (MEO) ta esun responsabel pa otorgá pèrmitnan ekonómiko na Kòrsou. Den kuadro di esaki, MEO su Departamento di Pèrmitnan Ekonómiko ta evaluá i tuma desishon diariamente riba petishonnan ku keda risibí via di Lokèt di Pèrmit.

Bou di pèrmitnan ekonómiko ta komprondé entre otro un pèrmit pa establesimentu di negoshi (vestigingsvergunning), e diferente pèrmitnan di HORECA, Ventvergunning, Standplaatsvergunning, pèrmit pa gerensia (directievergunning) i pèrmit di E-zone.

For di luna di yanüari te ku yüli 2018 MEO a risibí un total di 2.685 petishon pa pèrmitnan nobo òf kambio den pèrmitnan eksistente. Di e total di petishonnan risibí, un total di 2.373 a keda prosesá te ku awor. Esaki ta nifiká ku e petishonario ya a risibí su pèrmit òf a risibí en todo kaso un kontesta riba su petishon. E kantidat di petishonnan risibí tabata varia entre pèrmitnan di establesimentu, pèrmit pa gerensia di negoshi, pèrmit di establesimentu ‘onshore’ (pèrmit ku ta wòrdu otorgá na kompania ku ta hasi negoshi lokal) i pèrmit di establesimentu “offshore”(pèrmit ku ta wòrdu otorgá na kompania ku ta hasi negoshi den eksterior) i pèrmit pa kompanianan ku ta bai establesé den (un di) nos E-Zonenan.

For di e total di petishonnan risibí 1.206 tabata trata pèrmit di establesimentu pa negoshinan ‘onshore’; sea petishonnan nobo òf kambio di pèrmitnan eksistente. Di e 1.206 petishonnan aki 1.020 ya a keda prosesá i MEO tin ainda un total di 186 petishon den e kategoria aki den tratamentu.

Un total di 606 di e demas petishonnan risibí te ku yüli 2018 tabata trata pèrmit pa establesimentu di negoshinan “offshore”. Den e kategoria aki MEO ya a prosesá un total di 590 for di e kantidat di petishonnan risibí. Esaki ta nifiká ku te ku e momentunan aki tin un kantidat di solamente 16 petishon di pèrmit di e kategoria aki den proseso.
Pa loke ta trata petishonnan di E-Zone, MEO a prosesá tur e 42 petishonnan risibí entre yanüari te ku yüli di e aña aki.

Tambe MEO a risibí 662 petishon di standplaatsvergunning temporal i 59 petishon pa ventvergunning temporal kual tur a keda prosesá i entrega na e respektivo petishonario. For di febrüari di e aña aki tin un moratorio temporal riba pèrmitnan di standplaats permanente. Pues pa loke ta trata e kategoria aki e ministerio a trata solamente eventual petishonnan di prolongashon. Te ku luna di yüli MEO no a risibí niun petishon pa ventvergunning di karakter permanente.

Den kategoria di e diferente pèrmitnan di HORECA ku MEO ta risibí, e ministerio tin un total di 110 petishon ku ainda ta den tratamentu te ku yüli di e aña aki.

Tur persona interesá pa hasi petishon pa un òf mas di e pèrmitnan ekonómiko aki mester akudí pa esaki na Lokèt di Pèrmit situá na Saliña 127 (Eurobuilding Unit 3-8) pegá ku Subway òf yama pa mas informashon na 433-3100.

MEO kier hasi alabes un apelashon na kada persona ku a risibí notifikashon ku su pèrmit ya a keda aprobá, pa akudí na Lokèt di Pèrmit mas pronto posibel i tuma esaki.

Entretantu e trayekto pa sigui outomatisá e proseso pa otorgá e diferente pèrmitnan ekonómiko ta sigui avansá. MEO huntu ku Lokèt di Pèrmit a inisiá un proyekto piloto ku e pèrmit pa establesimentu di negoshi (vestigingsvergunning) i pèrmit pa gerensia (directievergunning). Ta e intenshon ku susesivamente lo pasa pa e otro tiponan di pèrmit tambe. E promé fase di outomatisashon aki ta planiá pa keda finalisá den luna di sèptèmber di e aña aki. Ku esaki MEO ta sigui hasi su máksimo esfuerso pa prosesá petishonnan mas lihé posibel pa di e forma aki kumpli ku su tarea di fasilitá i stimulá hasimentu di negoshi aki na Kòrsou.

gobiernu

 

 

Advertisements
%d bloggers like this: