Advertisements
window.dataLayer = window.dataLayer || []; function gtag(){dataLayer.push(arguments);} gtag('js', new Date()); gtag('config', 'UA-83616463-1');

SEPTEMBER LUNA DI KOLEKT DI PRINSES WILHELMINA FONDS Lema di 2018: “Yuda Nos Yuda nan!”

SEPTEMBER LUNA DI KOLEKT DI PRINSES WILHELMINA FONDS

Lema di 2018: “Yuda Nos Yuda nan!”

 

Riba 1 di sèptèmber próksimo Prinses Wilhelmina Fonds (PWF) ta start ofishalmente ku su luna di kolèkt. Ta trata di un akshon ku ta tuma lugá den henter luna di sèptèmber, kaminda ofishalmente PWF tin pèrmít di gobièrnu pa aserká komunidat pa un kontribushon finansiero. E lema pa aña 2018 ta: “Yuda Nos Yuda Nan!”. Mester bisa, ku danki na e fondonan ku PWF kolektá durante henter luna di sèptèmber, pues danki na e kontribushon di komunidat, PWF por kubri tur lokual e ta hasi pa e pashèntnan di kanser di Kòrsou. Prinses Wilhelmina Fonds ta un fundashon ku a keda lantá dia 16 di novèmber di aña 1949 ku ya pa mas ku 68 aña ta duna sosten i guia na pashèntnan di kanser i nan famia. Tambe PWF ta yuda den konsientisashon di nos komunidat riba e diferente aspektonan di e teribel malesa di kanser. Otro aña Prinses Wilhelmina Fonds ta selebrá su 70 aña di eksistensia.

 

Kolèktantnan bon identifiká

Pues durante henter luna di sèptèmber kolèktantnan di PWF lo bishitá nos kompania i empresanan lokal, pa asina por risibí nan kontribushon. Tambe komunidat lo por mira e diferente kolèktantnan i kolaboradónan di PWF ku nan buzon kòrá o shinishi pará sea na supermerkado òf otro lokalidatnan komersial tumando donashonnan di nos komunidat. Mester isa, ku tur kolèktant di PWF lo ta bon identifiká. Si bo tin duda, eksihí pa bo mira nan identifikashon. Tambe por yama i verifiká ku ofisina di Prinses Wilhelmina Fonds na telefòn 461-1998.

 

Duna segun bo forsa!

Meskos ku otro añanan e aña aki PWF ta bolbe konta riba e generosidat di nos komunidat i ta konta ku tur hende lo koperá mes bon ku nan a koperá semper. Tur montante ta bon biní. Pa aña 2018 PWF lo bai usa diferente sistema pa kolektá den nos komunidat. Meskos ku aña pasá, PWF lo tin su Call Center kaminda su kolaboradónan lo yama kompanianan lokal pa rekordá nan riba e diferente posibilidatnan ku tin pa nan por hasi nan donashon.

E fuente di entrada mas importante ku Prinses Wilhelmina Fonds tin, ta bini for di e kolèkt ku e ta tene tur aña den luna di sèptèmber. For di e fóndonan aki e ta paga salario di su trahadónan soshal ku ta duna guia i sosten na pashèntnan di kanser i tin biaha na nan famia. Tambe e ta paga transpòrt pa pashèntnan di kanser ku no tin transpòrt pa nan bai dòkter pa tuma kimo i radioterapia. Danki na e fondonan aki PWF por kumpra i fasilitá pashèntnan ku kama, ròlstul, andadera, prótesis, “BH” speshal i krùk. PWF tin un ròl grandi tambe pa kontinuamente produsí, repartí i fasilitá materialnan di informashon, di moda ku henter komunidat por keda informá i konsiente riba e diferente aspektonan di e malesa di kanser. Danki na e fondonan aki PWF por duna tambe terapia i oportunidat di rekreashon na pashèntnan di kanser.

PWF su kompromiso ku komunidat ta grandi

E kompromiso i responsabilidat di Prinses Wilhelmina Fonds den nos komunidat ta hopi grandi.  Ta realmente hopi kos PWF ta hasi pa tur pashènt di kanser den nos komunidat. E kos mas grandi i importante den esaki ta, ku mayoria di e servisionan ku Prinses Wilhelmina Fonds ta duna ta grátis. Pues e klientenan di kanser ni nan famia no ta paga pa e servisio ku PWF ta duna. Ta p’esei e luna di kolèkt ta hopi importante. Danki na e kolèkt aki Prinses Wilhelmina Fonds ta risibí e fondonan pa traha ku n’e. Pues mas abo komo suidadano por duna na Prinses Wilhelmina Fonds, mas kos Prinses Wilhelmina Fonds tambe por hasi pa pashèntnan di kanser i nos komunidat. Mas eksitoso e luna di kolèkt ta, mas tantu pashèntnan di kanser PWF por sigui yuda. Un kos ta sigur, tur fondo ku e PWF risibí, tur ta bai bèk.

E malesa di kanser ta mas serka di kas ku nos tur ta kere. Lokual bo aportá ku n’e awe lo sirbi pa PWF por sigui informá i konsientisá nos komunidat riba e teribel malesa di kanser. Esaki ta un apelashon na henter komunidat pa koperá den e lucha kontra kanser. Kòrda ku ta huntu, abo, komunidat, trahadónan sosial, médiko i boluntarionan ta forma Prinses Wilhelmina Fonds.

 

 

 

Advertisements
error: Content is protected !!
%d bloggers like this: