Advertisements

Cu inisio di e aña escolar nobo Cuido Salud Hubenil tambe ta ranca sali cu nan campaña anual di vacunacion escolar

Cu inisio di e aña escolar nobo
Cuido Salud Hubenil tambe ta ranca sali cu nan campaña
anual di vacunacion escolar

ORANJESTAD, Aruba – 21 augustus 2018: Cuido Salud Hubenil ta e seccion responsabel pa vacunacion di nos muchanan na scol primario y tambe pa mantene e cobertura di vacunacion na Aruba halto, pa proteccion di comunidad completo.

Tur aña na comienso di aña escolar nobo seccion Cuido Salud Hubenil atravez di nan data base ta saca afo precies cua muchanan bibando na Aruba a yega e edad pa haya un booster di vacuna. Un booster di vacuna ta e mesun vacuna cu e mucha a haya ora e tawata baby na Wit Gele Kruis, pero cu mester wordo ripiti pa mantene e sistema inmunologico di e curpa activo contra e diferente micro-organismonan cu ta ocaciona entre otro Difteria, Tetanus, Polio, Sarampi, Cacheton y Rubella.
Despues cu enfermera(o) nan di Cuido Salud Hubenil localisa e muchanan aki na e diferente scolnan na Aruba, mayornan ta ricibi un foyeto di informacion riba importancia di vacunacion y tambe un carta unda mayor tin cu firma pa duna permiso na e seccion pa vacuna e mucha. Mayornan mester firma e carta aki y entrega esaki mas pronto na e docente.
Muchanan cu no a nace na Aruba pero a wordo vacuna na nan pais di nacemento ta wordo pidi pa nan prueba di vacunacion. Abase di nan prueba di vacunacion ta saca afo si e mucha ta bon vacuna pa su edad of si e mucha falta vacuna segun schema di Aruba.
Seccion Cuido Salud Hubenil di Departamento di Salud Publico ta vacunando nos muchanan di Aruba pa mas di 50 aña. Ta traha di serca cu Pan-American Health Organization (PAHO) y ta sigui consehonan di Rijksinstituut voor Volksgezondheid en Milieu (RIVM) na Hulanda pa garantisa cu nos muchanan por crece for di peliger di e diferente malesanan cu por ocaciona daño permanente na nan salud y tambe cu nan ta ricibi vacuna di calidad halto.
Pa mas informacion por tuma contacto cu Departamento di Salud Publico na 5224200.

Advertisements
error: Content is protected !!
%d bloggers like this: