Advertisements

CTB ta kondená atake riba nos turismo

CTB ta kondená atake riba nos turismo 

 

WILLEMSTAD- 19 di ougùstùs 2018 – Ofisina di Turismo di Kòrsou (CTB) a tuma nota di e protesta ku a tuma lugá djabièrnè último na Baoase Luxury Resort i ta kondená enérgikamente e forma di protesta aki. CTB ta konsiderá esaki komo un atake frontal di parti di sr. Julius Koko i su siguidónan riba e sektor turístiko.

E sektor turístiko ta e úniko sektor ekonómiko ku ta mustra un kresementu den e situashon difísil ku nos pais ta aktualmente. Sektor turístiko ta generá riba un base anual 512 mion dòler (sifra di aña 2017) pa nos ekonomia i ta proyektá pa generá e aña aki un montante di 624 mion dòler. Tambe sektor turístiko ta generá aproksimadamente 8500 kupo di trabou direktamente i indirektamente 4000 kupo di trabou. Ademas sektor turístiko ta e mayor generadó di divisa pa nos pais. Esaki ta nifiká ku nos mester kuida e sektor aki pa garantisá e kresementu aki den futuro i garantisá e kuponan di trabou.

Ta un lástima ku tin algun persona ku no ta tene kuenta ku e pan di kada dia ku hopi famia ta gana pa kria nan sernan kerí for di sektor turístiko. Ofisina di Turismo di Kòrsou, CTB ta di opinion tambe ku mester respetá propiedat privá. Nos ta biba den un pais ku konosé estado di derecho kaminda un persona su propiedat privá mester keda respetá i esaki ta reglá pa lei.

CTB ta spera ku outoridatnan ta tuma medida tambe kontra esnan ku no ta respetá propiedat privá di otro. Nos ta spera ku algu asin’aki no ripití hamas den e pais aki ku ta keda habitá pa hendenan amabel, alegre i ku ta respetá tur rasa, religion i nashonalidat ku ta biba i kompartí huntu riba nos pais.

Advertisements
%d bloggers like this: