Advertisements

KOMUNIKADO DI KUERPO POLISIAL KÒRSOU Reakshon riba vershon inkorekto den prensa.

KOMUNIKADO DI KUERPO POLISIAL KÒRSOU

343 / 2018

16 ougùstùs 2018

Reakshon riba vershon inkorekto den prensa.

Departamentu di Komunikashon i Prevenshon

KUERPO POLISIAL KÒRSOU SIRBI I PROTEHÁ

Na kuminsamentu di e siman aki a sali den algun medio di komunikashon, informashon no
korekto tokante di aktuashon di polis, a base di un entrevistá ku nan a sostené ku
propietario di e kompania di seguridat O.P.T., sr. Pieternella.
No ta usual ku Kuerpo Polisial ta reakshoná riba e tipo di kasonan aki, pero no ta aseptabel
tampoko ku un siudadano ta daña nòmber di miembronan di e kuerpo, fabrikando un
kuenta, ku e simpel fin pa tapa un eror ku e mes a kometé.
Ta referí aki spesífikamente na e kaso na un establesimentu di dibertishon na Janthiel, unda
ta tilda un agente polisial ku a keda aserká pa un turista, i konsekuentemente a pidi e ofisial
di seguridat pa debolbé na polis e suma ku el a kobra, na momentu ku e ofisial a haña e
turista ku un kantidat di droga den su poder.
E ofisial di seguridat aki a alegá ku aparte ku e polis en kestion a sali na interes di su amigu,
e tabata bou di influensia di alkohòl tambe.
Kuerpo Polisial, den tur transparensia a investigá e kaso aki i e siguiente puntonan aki a sali
na kla:
1. E polis no konosé e turista i no ta e polis ta esun ku a aserka e turista;
2. E polis ku tabata den su ora liber, niun momento so tabata bou di influensia di
alkohòl;
3. Sr. Pieternella, despues di e a kita e droga for di bishitante turista aki, en bes di
entregá esaki inmediatamente na polis, a deshasí di e droga;
4. Sr. Pieternella a duna e bishitante turista opshon pa sea paga mesora 151 florin òf
lo e pone polis na altura. E turista a skohe pa paga e 151 florin.
Ningun siudadano, tampoko kompania di seguridat, na momentu ku nan konstatá un echo
kastigabel, por duna e sospechoso un kastigu, opshon den kastigu òf deshasí di esaki. Esaki
ta prerogativa únikamente di Ministerio Públiko.
Ku esaki Kuerpo Polisial ta spera di a duna su banda den e kaso aki i alabes ta konsiderá e
kaso aki den publisidat komo será.

 

Advertisements
%d bloggers like this: