KOMUNIKADO DI KUERPO POLISIAL KÒRSOU
340 / 2018
15 ougùstùs 2018

Entrada hudisial ku detenshon.

Departamentu di Komunikashon i Prevenshon

KUERPO POLISIAL KÒRSOU SIRBI I PROTEHÁ

Djamars 14 ougùstùs 2018, alrededor di 06.00 or di mainta, personal di Divishon di Krímen Organisá den kooperashon ku KMAR, Marina, UST i Tim di Aresto a tene entrada hudisial na tres diferente adrès, respektivamente: den área di Kirindongo Abou, Sunset Heights i Nabij Vetter. E entradanan hudisial ta den kuadro di un investigashon penal ku ta andando relashoná ku un kaso di droga i violashon di e Lei di Arma.

Durante di e entradanan hudisial dos sospechoso a keda detené. Ta trata di e hòmbernan:
 W.A.M. 32 aña di edat, nasé na Kòrsou i
 C.J.J. 50 aña di edat, nasé na Kòrsou.
Siguiendo ku e investigashon na e adrès den área di Kirindongo Abou, polis a haña i konfiská entre otro:
 Kuater (4) arma di kandela;
 Algun telefòn selular i
 Un kantidat grandi di plaka kèsh.

En konekshon ku esaki un dama V.C.M. di 30 aña di edat, nasé na Kòrsou a keda detené.
A presentá e sospechosonan dilanti di un Fiskal Ouksiliar ku a ordená enkarselamentu di e dos hòmbernan sospechoso pendiente di mas investigashon. E dama a keda poné den libertat despues di interogashon.
E investigashon ta kontinuá.