Advertisements

E konvikshon den e kreensha universal di UBUNTU lo konektá maestro i dosentenan di Fundashon Skol Humanista na Papiamentu pa e aña eskolar 2018-2019 .

E konvikshon den e kreensha universal di UBUNTU lo konektá maestro i dosentenan di

Fundashon Skol Humanista na Papiamentu pa e aña eskolar 2018-2019 .

Willemstad, 13 ougùstùs 2018.

Awe Fundashon Skol Humanista na Papiamentu a tene su konferensha inisial pa aña eskolar 2018-2019 na Renaissance Hotel na Otrabanda.

For di e filosofia humanista diferente orador a hiba palabra awe mainta i a enfoká riba e diferente aspekto di desaroyo di identidat kolektivo. A para ketu na aspektonan sumamente importante pa krea nashon atraves di edukashon i e importansha di komprenshon kla di loke ta forma nos Identidat Kolektivo pa finalmente kompañá esaki ku un aserkamentu profeshonal pa desaroyá e metodologia korekto pa alkansá e metanan deseá. Tur esaki ta pone un responsabilidat grandi riba lomba di e dosentenan di Skolnan Humanista ku kier ta inovativo.

Despues di apertura i kantamentu di nos himno Nashonal i palabranan di animashon di sr. Oswin Martina, presidente di FSHP, a start e serie di presentashonnan. Señor Max Elstak a papia riba e importansha i ròl di Edukashon den mundu i den bida di kada un di nos. Señora Sue Girigorie a papia riba e tópiko di Identidat Kolektivo, sigui pa señor Stanley Kirindongo ku den forma práktiko a amplia riba formanan ku por implementá un metodologia struktural pa alkansá e reto i ophetivonan ku tin pone dilanti di e dosentenan di Skol Humanista na Papiamentu. Finalmentte sra Jeanne Henriques a animá, motivá i empoderá e dosentenan presente pa ekselá den e bon trabou ku ya nan a bin ta hasi ku resultadonan tangibel sin bagatelisá e hecho ku tin un responsabilidat grandi poné riba lomba di tur dosente na Skol Humanista.

De un seshon plenario e sala por a opiná, dialogá, evaluá e loke a ser trese dilanti pa finalmente konkluí i yega na palabrashonnan konkreto i importante pa e aña eskolar nobo 2018-2019.

Ku un seremonia netamente krioyo, reuní rondó di un tremendo KALBAS, (komo símbolo di unidat i koperashon, felisidat i protekshon), direktiva i dosentenan a grupa e skolnan chikí bai grandi. E promé sirkulo tabata dosentenan di SKAIH Pre- universitario, siguí pa dosentenan di Kolegio Erasmo SKAIH VSBO i den e sirkulo pafó maestronan di Kolegio Erasmo ku a ratifiká nan esfuerso unifikadó i energétiko pa HUNTU drenta e aña eskolar 2018-2019 yen di speransa di por hunga un ròl klave den realisashon di e aspirashonnan edukashonal di nan alumnonan. Den bos haltu i ku forsa nan a konkluí e seremonia ku e ekspreshon UBUNTU. ( ku ta nifiká MI ta pasobra NOS ta!

 

Advertisements
%d bloggers like this: