Advertisements

SITUASHON NA PLAYA GRANDI NA WESTPUNT MESTER DI ATENSHON EKSPERTO URGENTE.

Gisette Seferina (PAR): pa evitá ku kos ta sali fo’i man:

 

SITUASHON NA PLAYA GRANDI NA WESTPUNT MESTER DI ATENSHON EKSPERTO URGENTE.

 

WILLEMSTAD – Parlamentario Gisette Seferina (PAR), despues di a bishitá playa Grandi, tambe konosí komo playa Piskadó, na varios okashon durante último tempu, ta ekspresá su preokupashon pa e aparente falta di maneho ku tantu e piskadónan ku ta traha na e playa komo demás bishitantenan ta konfrontá na e playa menshoná. E Parlamentario ta urgi outoridatnan kompetente pa atendé ku e preshon di uso pa evitá ku por surgi konflikto entre usuarionan.

“E nomber di e playa ta papia pa su mes: ta un playa kaminda e proposito primario ta pa piskadónan por dediká na e fishi di peska artesanal den tur trankilidat. E situashon ku tin na e playa aworaki ta totalmente kontrario na e meta stipulá”, asina Seferina ta deklará. Segun e parlamentario e desaroyo aki ta fomentá iritashon entre e usuarionan. “Ya pa un tempu kaba e popularidat di e playa aki ta kresiendo, espesialmente pa motibu ku tin un poblashon di turtuga na e playa, loke ta hala masha hopi hende ku ke bin mira e bestianan”. Pero sin un plan di regulashon di aktividat riba e playa, e diferente aktividatnan ku ta tuma lugá por hasta stroba otro.

Playa Piskadó, ku su pir, su slip i mesa di limpia piská, a para bira un atrakshon turístiko, ku parasòl pa hür riba e playa, i hendenan drumí ta tuma solo kaminda piskadó ta seka reda, monton di hende ta snorkel kaminda botonan di piskadó mester yega pa atendé ku limpiamentu i benta di nan piská. Además, ta yega bùsnan basta grandi yen di turista, vèn i pickup ku ta bin baha sambuyadó, i hendenan ku ta bini ku outo, sin ku tin lugá adekuá pa parkeer na e sitio. Sra. Seferina ta remarká ku no tin fasilidat higiéniko tampoko (tualèt i sufisiente bak’i shushi) pa akapará e kantidat di bishitante ku ta bai e playa tur dia. “No ta korekto ku mester instruí usuarionan pa bai hasi nan nesesidat den e bòskòshinan den bisindario. Ta un bergüensa ku ta asin’aki nos ta atendé ku piskadó i bishitante na e playa tan popular aki” asina e parlamentario a enfatisá.

Seferina ta indiká ku durante añanan ku a pasa diferente instansia lokal i internashonal a trese ku rekomendashonnan basá riba análisis sientífiko di e patronchi di uso di e diferente gruponan ku ta hasi uso di playa. Rekomendashonnan formal riba e tópiko aki a haña aprobashon di Konseho di Minister aña pasá (2017) i ta warda reakshon di parti di e ministerionan ku ta atendé ku implementashon di e rekomendashonnan aki na e playanan di pueblo.

Segun e parlamentario, kontròl i mantenshon di òrdu dor di e outoridat kompetente na nos playanan públiko lo fortifiká e maneho nobo ku Seferina ta spera lo bini mas pronto posibel, pa asina evitá konflikto entre usuarionan di nos playanan públiko, i espesialmente na Playa Piskadó.

Advertisements
%d bloggers like this: