Advertisements
window.dataLayer = window.dataLayer || []; function gtag(){dataLayer.push(arguments);} gtag('js', new Date()); gtag('config', 'UA-83616463-1');

Den kuadro di selebrashon 20 aña di kompetensia “Lesa pa Otro Skucha” Seri di charla “Plaser den Lesamentu”

Den kuadro di selebrashon 20 aña di kompetensia “Lesa pa Otro Skucha”
Seri di charla “Plaser den Lesamentu”

Willemstad – Awendia mundu kompletu ta drai hopi rondó di teknologia i aparatonan digital kual ta kousa ku poko poko pero sigur e atenshon ta kita for di e importansia di lesamentu. Lesamentu ta benefisioso i sumamente importante pa desaroyo di un mucha. Fundashon SIGE (Sentro pa Inovashon i Guia Edukashonal) den su afan pa konsientisá tokante e importansia di lesamentu den nos komunidat ta organisá un seri di charla titulá Plaser den Lesamentu. E seri di charla ta forma parti di selebrashon di 20 aña di kompetensia “Lesa pa Otro Skucha”, kual ta ser organisá anualmente dor di SIGE. Durante e charlanan lo trata e 4 temanan ‘Desaroyo di Lesamentu’, ‘Problema i Estorbo ku Lesamentu’, ‘Kon pa lesa ku mi yu’ i ‘Importansia di Análisis di Formanan Individualisá (AVI/AFI)’. E oradornan di e charlanan lo ta sra. drs. Ivette Hato, sra. Lucille Hernandez i sra. Aishel Statie. Nan lo duna tambe tepnan ku por yuda mayornan i edukadónan stimulá lesamentu serka un mucha na maneranan kreativo. SIGE ta invitá pueblo di Kòrsou kompletu pa partisipá na e seri di charla, kual lo tuma lugá na luna di sèptèmber i òktober.

E charla ku e tópiko “Desaroyo di Lesamentu” lo duna informashon tokante e manera ku e desaroyo aki ta tuma lugá, ròl di mayor i edukadó den e desaroyo aki i e manera ku por pèrkurá pa e mucha tin plaser den lesamentu. “Problema i Estorbo ku Lesamentu” lo trata e tipo di problemanan ku un mucha por tin ora ku e ta lesa i maneranan pa mayornan i edukadónan remediá e situashon. E charla di “Kon lesa ku mi yu” lo konsientisá mayornan di maneranan agradabel pa lesa ku mucha i asina krea plaser den lesamentu. Finalmente, e charla “Importansia di AVI/AFI” lo splika kon e materia ta hinká den otro, su meta i tambe duna tep pa práktika.

E seri ta konsistí di charlanan tokante e 4 diferente tópikonan menshoná. Kada charla lo trata un tópiko spesífiko. Sinembargo, en bes di 4 seshon lo tin 8 seshon na tur ya komo ku lo ripití kada tópiko. Pues, lo tin e mesun charla dos bes; un bia pa habitantenan di p’ariba i un bia pa habitantenan di p’abou. Di e forma aki SIGE ta purba tene konsiderashon mas tantu posibel i alabes fasilitá interesadonan ku ta deseá na partisipá.

Akibou por mira un skema ku e fechanan, lokalidat i tópiko di e charlanan. Tur charla ta kuminsá 18:30 i ta kaba 20:00.

Fecha Lokalidat Tópiko
Djamars 4 di sèptèmber Biblioteka Nashonal di Kòrsou (BNK) Desaroyo di Lesamentu
Djaluna 10 di sèptèmber Stichting Jeugdcentrale Curaçao (JCC) Desaroyo di Lesamentu
Djaluna 17 di sèptèmber BNK Problema i Estorbo ku Lesamentu
Djaluna 24 di sèptèmber JCC Problema i Estorbo ku Lesamentu
Djaluna 1 di òktober BNK Kon lesa ku mi yu?
Djamars 16 di òktober JCC Kon lesa ku mi yu?
Djamars 23 di òktober BNK Importansia di AVI/AFI
Djamars 30 di òktober JCC Importansia di AVI/AFI

Pa partisipashon por pasa personal registrá na SIGE (Groot Davelaar 22-23) entre 8:00-12:00 i 14:00-17:00, yama na 747-2700/ 738-6570, òf manda un e-mail na a.justiana@sige.cw/ m.ercicia@sige.cw.

Sentro pa Inovashon i Guia Edukashonal (SIGE)
E nòmber SIGE ta enserá e koperashon entre fundashonnan ‘Sentro pa Guia Edukashonal (SGE)’ i ‘Fundashon pa Inovashon di Enseñansa (FIdE)’. Huntu nan tin komo meta e preparashon, desaroyo i implementashon di e maneho pa ku inovashon i mehorashon di e nivel di enseñansa i edukashon di Pais Kòrsou. Den kuadro di e maneho aki, SIGE ta duna sosten na tur aktor den e vèlt di enseñansa i edukashon pa por alkansá optimalisashon i inovashon. SIGE ta kumpli ku e tarea aki dor di konsehá, guia, sostené i duna treinen pa ku asuntunan pedagógiko, didáktiko i di estudio.

Advertisements

Skibi bo komentario / Opinion

This site uses Akismet to reduce spam. Learn how your comment data is processed.

error: Content is protected !!
%d bloggers like this: