Advertisements

Hòmber asesiná den su vehikulo na Sint Maarten

Hòmber asesiná den su vehikulo na Sint Maarten

Departamentu di Reshèrshi aktualmente ta investigá un kaso di tiroteo fatal di un hòmber, kual a tuma lugá riba djadumingu 5 di ougustus algu pasá di 4or di mardugá. Di akuerdo ku raportahenan, e promé yamada ku a drenta na sentro di emergensia, a drenta mas o menos 04.25 di mardugá informando e personal di un tiroteo ku a tuma lugá riba kaminda pa aeropuerto den bisendario di RBC-bank i Banco de Caribe. Inmediatamente despues di a risibí e informashon aki, diferente patruya polisial a keda dirigí na e sitio pa investigá kiko a sosodé. Na e sitio, agentenan polisial a enkontrá ku kurpa di un hòmber viktima ku no tabata duna señal di bida. E viktima a keda identifiká komo J.W. ku tabata den su vehikulo numerá P-207. Aparentemente e tiru fatal a alkansá e viktima na momentu ku e tabata bandoná e sitio di stashoná auto. E area a keda será mes ora pa agentenan polisial pa segurá e area di e krimen pa Departamentu Forensiko i reshèrshinan por akumulá evidensia i papia ku posibel testigunan. Trafiko den e area tambe a keda desviá den direkshon di e kaminda bieu pa bai Simpson Bay.
Dòkter Mercuur ku a yega na e sitio a deklará morto di e viktima. Kurpa di e viktima a keda konfiská riba òrdu di Ministerio Publiko, Martin Van Nes, ku tabata na e sitio huntu ku hefe di kuerpo polisial, Carl John i otro hefenan di otro departamentu.
Mas detaye no ta disponibel na e momentu aki komo ku e investigashon ta den su fase preliminar. Na momentu ku tin mas detaye disponibel, medionan lo keda informá. No tin sospechoso ku a keda identifiká ni arestá den e investigashon.
Outoridatnan ta pidi koperashon di kualke persona ku por a mira loke a tuma lugá òf ku por tin kualke informashon ku por kondusí na aresto di esnan responsabel pa e tiroteo aki, pa tuma kontakto ku e departamentu di reshèrshi dor di yama number di telefon 54-22222 ext. 213/214, e liña pa tepnan anonimo #9300, number di emergensia 911 òf manda un mensahe privá (private message) pa e pagina di Facebook di Polis.
Advertisements
%d bloggers like this: