Advertisements

Posishon finansiero di Kompania di Tou Kòrsou (KTK) i posibilidat di pèrdida di e aktual kuponan di trabou.

Na:      Minister di Ekonomia

Señor I.S. Martina

Pletterijweg 43

PRESENTE

 

 

Willemstad, 17 di yüli 2018

Tópiko: Posishon finansiero di Kompania di Tou Kòrsou (KTK) i posibilidat di pèrdida di e aktual kuponan di trabou.

 

Señor Minister Martina,

Frakshon di MFK, ku insistensia ta risibí señal for di diferente instansia i personanan ku ta eksistí un posibilidat real ku e kompania KTK lo por haña su mes pronto den problemanan finansiero i ku lo por tin komo konsekuensia ku lo bai tin pèrdida di kuponan di trabou.

 

Teniendo na kuenta medidanan tuma dor di Gobiernu ku a kousa ku nos ta pasando den un reseshon ekonómiko i ku KTK ta entre otro un di e kompanianan di gobiernu ku ta kontribuí no solamente na nos ekonomia, pero tambe ta generá divisa ku tambe ta un aspekto importante den desaroyo total di Kòrsou, nos ta hopi preokupá ku kualke desaroyo ku por afektá e funshonamentu di KTK.

 

Teniendo esaki na kuenta, frakshon di MFK kier kana dilanti riba e desaroyonan pa nos frakshon den Parlamento por ta na altura di e desaroyonan ku por tin konsekuensianan negativo pa nos ekonomia i den e kaso spesífiko, pero tambe pa trata na evitá ku mas yunan di tera ta pèrdè trabou.

 

Frakshon di MFK hasiendo uso di nos derecho di hasi pregunta ankrá den artíkulo 96 di Reglamentu di Orden i tambe artíkulo 57 di nos Areglo di Estado, kier hasi Minister Martina e siguiente preguntanan;

 

  1. Minister por informá Parlamento kon e posishon di likides di KTK ta na e momentunan aki?

 

  1. Ta bèrdat ku ta vislumbrando e posibilidat ku KTK lo bai tin problemanan finansiero riba término korto?

 

  1. Minister por manda pa Parlamento kuentanan anual oudita for di 2013 te ku 2017 di KTK?

 

  1. Problemanan finansiero di KTK lo por tin konsekuensia pa ekonomia i entrada di divisa pa Kòrsou i di ki embergadura esaki nan lo ta?

 

  1. Ta bèrdat ku debí na tantísimo problemanan rondó di Refineria ISLA ku no ta operando na e nivel kustumbrá, ku esaki tin reperkushon riba entradanan di KTK?

 

  1. Ingresonan di aktividatnan di Refineria ISLA ta representá kuantu porshento di aktividat finansiero di KTK?

 

  1. Por informá Parlamento kuantu empleado tin na KTK ku ta den servisio permanente i kuantu empleado ta traha pa medio di un kontrakt?

 

  1. Ta bèrdat ku lo no renobá kontratonan di empleadonan ku ta terminá na final di aña 2018?

 

  1. Ta e intenshon di KTK pa redusí personal ku ta den den servisio permanente di e kompania?

 

  1. E flota di barku ku KTK ta hasi uso di dje pa ehersé nan trabou ta den bon estado o esakinan tin falta di mantenshon?

 

  1. Si ta bai retirá empleadonan sea den servisio permanente òf ku kontrakt, esaki lo trese kuné ku lo mester redusí e kantidat di barku ta wòrdu usa aktualmente pa ehersé e trabounan diario?

 

  1. Si kontesta riba pregunta 11 ta afirmativo, kuantu trahadó ta bai pèrdè nan trabou?

 

  1. Si kontesta na pregunta 10 ta afirmativo Minister por duna un splikashon detayá kon lo bai atendé ku esaki?

 

  1. Minister ta konsiente ku e desishon di Gabinete Rhuggenaath pa kana un trayekto nobo pa ku futuro di Refineria ISLA tin konsekuensianan negativo kaba pa ekonomia di Kòrsou?

 

  1. Ta e intenshon pa Gabinete Rhuggenaath pa pone Kòrsou komo garantia pa por hasi e negoshi di Refineria ISLA su modernisashon posibel na kompanianan ekstranhero?

 

  1. Mirando ku e debe Nashonal a oumentá den e último 5 añanan yegando na kasi 3000 mion florin, Minister ta konsiderá pa sigui fia i òf para garantia, hipoteká e generashon ku no a nase ainda su futuro algu inhustu i no di bon gobernashon?

 

Rekordando Minister Martina riba e obligashon ku ta ankra den nos Areglo di Estado pa gobièrnu duna miembronan di Parlamento tur informashon rekirí i tambe ku den e protokòl firma entre Parlamento i Gobièrnu, ku kontestanan riba preguntanan hasi dor di miembronan di Parlamento mester wòrdu kontesta no mas tardá ku denter di 6 siman, nos ta keda en espera di Minister su kontestanan.

 

Atentamente,

 

Gerrit F. Schotte

Miembro di Parlamento di Kòrsou i

Lider di frakshon di MFK

Advertisements
error: Content is protected !!
%d bloggers like this: