Advertisements

Deskriminashon den trato entre Hofinan/Klupnan i establesementunan den Pietermaai

Deskriminashon den trato entre Hofinan/Klupnan i establesementunan den Pietermaai

 Pa Pietermaai si gobiernu por a aktua lihé i duna dispensashon pa bin ku posibel solushon, miéntras ku hòfi i klupnan tradishonal, ku ta parti di nos kultura si ta keda wòrdu molestiá ketu bai pa kehonan di “Geluidsoverlast”

Kòrsou, 15 yüli 2018,

Frakshon di MFK a tuma nota di e suseso ku a tuma lugá den Nieuwestraat na Pietermaai, kaminda outoridatnan a sera i prohibí algun establesimentunan ku tin presentashon di músika bibu di siguí opera sin permit. Esaki despues di a risibí keho di estorbo di zonido, di abitantenan ku ta biba den e area. Ku asombro nos a tuma nota ku den den apénas un siman gabinete Rhuggenaath a atendé ku e situashon ku a surgi den Konseho di Minister.

Miéntras klupnan tradishonal i nos hòfinan ku ta dispone di un pèrmit pa músika bibu te awe ta wòrdu limitá i molestiá pa outoridatnan pa por ofresé na yunan di tera fiestanan kaminda nos artistanan lokal i bandanan lokal por toka musika bibu.

Gabinete Rhuggenaath ta krea un desbalanse total òf hasta nos por papia di deskriminashon, privilegiando establesimentunan ku ta dirigí mas riba e kliente hulandes ku ta frekuentá den e area di Pietermaai, esaki kompará ku e areanan kaminda nos yunan di tera ta bishita, esta klupnan i hòfinan kual ta un tradishon i parti di nos kultura, kaminda por skucha i baila produkshonnan di nos mes artistanan lokal.

Ta straño pa tende kon Gobiernu den un reunion di konseho di Minister den ménos ku un siman ku a surgi e problema di faltamentu di lei i regla, ta tuma posishon i tin idea kon ta bai solushoná e situashon pa no perhudiká operashon di e negoshinan dunadónan tres luna di dispensashon pa nan por regla pèrmit pa músika bibu, siendo klupnan tradishonal i hòfinan tin nan pèrmit i ta wòrdu stroba pa por tin evento ku músika bibu.

A dal diferente hòfi i sitionan nokturno sera sin mas i sin ningun klase di kompashon i komprenshon, pa e yu di tera si no tin espasio pa trata e problemátiko den konseho di Minister. Pa otronan si tin espasio pa aktua den tempu rekòr i ta tene komprenshon pa no perhudiká e negoshinan dunando nan un periodo di grasia pa por regla nan pèrmitnan.

E pregunta klave ta, ku kua midi ta midi, pa ken si ta apliká lei i pa ken no?

Nos ta positivo ku mester mantené kuponan di trabou tantu den e establesimentunan, komo pa nos músikonan lokal ku ta presentá den e area aki, pa asina tur por sigui haña un entrada. Pero na nos humilde opinion e trato mester ta igual pa tur establesimentu na Kòrsou i no por tin segmentashon ora ta apliká lei i ta duna dispensashon. Nos ta spera ku e komunikado aki lo sirbi pa konsientisá nos komunidat i Ministernan di gabinete Rhuggenaath riba e deskriminashon ku nan ta aplikando riba diferente situashonnan ku a presentá ront di e tema aki “Geluidoverlast”.

Nos ta spera ku ningun hende lo pretendé ku e komunikado aki nos ta òf kier krea divishon i/òf rabia di un rasa riba e otro. Esaki debí ku loke nos a relatá i referí na dje den e komunikado aki ta kasonan real ku a bin ta tuma lugá ultimamente.

E trato desigual di parti Gabinete Rhuggenaath privilegiando un grupo riba e otro no ta akseptabel mas, sigur no pa frakshon di MFK i nos ta spera ku entrante awe lo no molestiá nos klupnan i hòfinan ku si ta operando ku nan pèrmitnan manera debe ser. I si konstatá kualkier infrakshon serka doñonan di klupnan i hòfinan ku lo apliká e mesun dispensashon ku a wòrdu apliká awor aki pa nan tambe.

Atentamente,

  1. Gilbert Doran

Miembro di Parlamento (MFK)

Advertisements
error: Content is protected !!
%d bloggers like this: