Advertisements

Velas Latinoamerica Curaçao 2018, un aktividat pa henter famia

Velas Latinoamerica Curaçao 2018, un aktividat pa henter famia

 

WILLEMSTAD-  Minister di Desaroyo Ekonómiko, Steven Martina ta felisitá Curacao Sail Foundation ku e tremendo inisiativa pa organisá e grandioso aktividat ‘’ Velas Latinoamerica Curaçao 2018’’.

 

Dianan 15 te ku 18 di yüli próksimo lo ta dianan históriko pa nos haf atrobe. Esaki, na momento ku barkunan di bela di no ménos ku 8 pais den Latinoamérika bishitá nos bahia di Santa Ana pa e evento di Velas Latinoamerica Curaçao 2018.

Velas Latinoamerica 2018 ta e di tres edishon di un regata internashonal ku ta konsentrá riba Paisnan den Amérika Latina. E regata aki a kuminsá for di 25 di Mart di e aña aki na Rio de Janeiro pasando asina diferente hafnan den region i lo terminá dia 2 di Sèptèmber na Veracruz, México. Dianan 15 pa 18 di yüli awor ta toka turno pa Kòrsou. Un kantidat di 11 barku di bela prosedente di Argentina, Brasil, Chile, Ecuador, Colombia, Uruguay, Spaña, Portugal, Perú, Venezuela i México lo tei di bishita den nos haf realisando un desfile sumamente atraktivo, inolvidabel i históriko den nos sentro di siudat. Huntu ku e barkunan di bela lo tin tambe un fragata di Marina Real.

Durante Velas Latinoamerica Curaçao 2018 lo tin diferente evento den Punda i Otrabanda aparte di e echo ku kada un di e barkunan mes tambe lo ta habrí pa públiko por pasa i atmirá abordo di nan kada un.

Mirando e posishon geográfiko klave ku Kòrsou ta gosa di dje i nos bahia úniko den sentro di siudat, e regata aki ta un oportunidat ekonómiko sumamente importante pa nos pais. Kòrsou tin e kapasidat pa ta e link perfekto entre Latino Amérika i e region Karibense, lokual ta hasi Kòrsou un hub indiskutibel pa barkunan rònt mundu nabegando den Karibe.

Minister Martina i MEO ta felisitá Curaçao Sail Foundation ku e gran inisiativa aki.

Grandi i chikí ta keda kordialmente invitá pa pasa i disfrutá di e tremendo ambiente den Punda i Otrabanda dianan 15 pa 18 di yüli awor. Velas Latinoamerica Curaçao 2018 lo tin aktividatnan pa henter famia.  E programa di Velas Latinoamerica Curaçao 2018 ta publiká entre otro riba e página di Facebook di Velas Latinoamerica Curaçao i mas ku klaro tambe e página di Facebook di Minister Steven Martina i Ministerio di Desaroyo Ekonómiko

Advertisements

Skibi bo komentario / Opinion

This site uses Akismet to reduce spam. Learn how your comment data is processed.

error: Content is protected !!
%d bloggers like this: