Advertisements
window.dataLayer = window.dataLayer || []; function gtag(){dataLayer.push(arguments);} gtag('js', new Date()); gtag('config', 'UA-83616463-1');

Kòrsou ku enkuentro históriko ku Sekretario General di Nashonnan Uní

 

 

Kòrsou ku enkuentro históriko ku Sekretario General

di Nashonnan Uní

Geplaatst op 11 Yüli 2018 dor di Ministerio di Asuntunan General i Promé Minister

NEW YORK — Promé Minister di Kòrsou Sr. Rhuggenaath tabatin e honor di por tene un enkuentro di nivel haltu ku Sekretario General di Nashonnan Uní na New York. Nos promé Minister a tene un interkambio personal den ofisina di Sekretario General Antonio Guterres pa deliberá riba diferente tema di importansia pa islanan chikí den desaroyo, kual den e sistema internashonal ta keda referí komo SIDS, Small Island Development States. SG Guterres a tuma mando di Nashonnan Uní na komienso di 2017 komo e di nuebe Sekretario General den historia di Nashonnan Uní i ta trahando pa trese reformanan den e sistema di Nashonnan Uní pa mantené pas i sirbi bienestar di paisnan rònt mundu.

Promé Minister a papia riba retonan ku nos isla i otro isla ta eksperiensiá i a interkambiá riba kon e sistema global di Nashonnan Uní por kontribuí den desaroyo di paisnan similar na nos. Komo isla chikí, aunke ku un nivel di entrada relativamente haltu kompará ku sierto otro pais na mundu, nos tin vulnerabilidatnan spesífiko ku nos mester dil kuné i nos ta enfrentá shòknan eksterno ku por ta difisil pa islanan karga. Den kaso di Kòrsou a papia di e efekto di e situashon na Venezuela riba nos pais i nos ekonomia. Pero tambe kon por mihó akapará ku posibel riesgo i retonan manera kambio di klima i su efektonan, komo ehèmpel orkannan desastroso òf subidá di nivel di laman. Esei ta trese riesgo di seguridat no solamente den nos region pero rònt mundu. Durante e miembresia di Reino Hulandes na Konseho di Seguridat di Nashonnan Uní, esei ta un di e tópikonan di importansia.

Durante e enkuentro a interkambiá ku por fasilitá akseso na ekspertisio i rekurso, i fomentá kolaborashon pa yuda islanan logra desaroyo sostenibel. Promé Minister di Kòrsou Eugene Rhuggenaath a duna di konosé ku Kòrsou tambe ya ta trahando ku e SDGs, e metanan global di desaroyo sostenibel i nos a bin ta konta ku sosten di agensianan di Nashonnan Uní pa logra implementashon di nos prioridatnan nashonal pa ku kombatimentu di pobresa, kresementu ekonómiko i kreashon di trabou i tambe infrastruktura.

Den oranan di mainta Promé Minister Rhuggenaath a tene un spich den e Konseho di Seguridat Mundial, kual ta un esenario di hopi importansia den kuadro di seguridat, hustisia i diplomasia. Tur 15 miembro di e Konseho, inkluso miembronan permanente manera Merka, Rusia, Fransia, Inglatera i China i algun invitadonan spesial a interkambiá riba e tema.
____

Informashon adishonal: SG Guterres tabata e Promé Minister di Portugal di 1995 pa 2002 i tabata Komisario pa refugiado na kabes di UNHCR di 2005 pa 2015.

Advertisements
error: Content is protected !!
%d bloggers like this: