Advertisements

Minister Eugene Rhuggenaath na Konseho di Seguridat di Nashonnan Uní (wak video)

Minister Eugene Rhuggenaath na Konseho di Seguridat di Nashonnan Uní

Willemstad – Dia 10 te ku 12 di yüli Promé Minister Eugene Rhuggenaath lo ta na New York pa partisipá na un reunion di e Konseho di Seguridat di Nashonnan Uní. Esaki riba petishon di Minister di Asuntunan Eksterno di Reino Hulandes, sr. Stef Blok. Durante e reunion aki Minister Rhuggenaath lo pone atenshon riba importansia di islanan chikitu ku ta estadonan den desaroyo i kambio di klima mundial.

E Konseho di Seguridat di Nashonnan Uní ta e organo internashonal di mas importante na mundu kaminda ta reuní i tuma desishon tokante pas i seguridat na mundu. For di 1 yanüari 2018 Reino Hulandes ta miembro di e konseho aki. E konseho ta konsistí di 15 miembro di kual 5 ta permanente (China, Fransia, Rusia, Inglatera i Merka). Kada 2 aña e Reunion General di Nashonnan Uní ta skohé e sobra 10 miembronan.

Mas òf menos kada 20 aña a toka Reino Hulandes pa forma parti di e Konseho di Seguridat di Nashonnan Uní. Delaster bes tabata di aña 2000 pa 2001. Kemen esaki ta un oportunidat úniko pa Kòrsou, representando Reino Hulandes, por partisipá den e plataforma aki. Konseho di Seguridat di Nashonnan Uní ta e plataforma mas importante na mundu kaminda ta tuma desishonnan tokante konfliktonan internashonal, mishonnan di pas i derechi humano.

E reunion ta dura un dia. Minister Rhuggenaath ta bek na Kòrsou djaweps awor.

 

 

 

 

Advertisements
%d bloggers like this: