Advertisements

Domeinbeheer ta introdusí proyekto Micro PPP “Ban Biba Barber”

Domeinbeheer ta introdusí proyekto Micro PPP “Ban Biba Barber”

 

Willemstad Ya pa algun aña Domeinbeheer a bin ta introdusí diferente proyektonan di konstrukshon di bibienda pagabel komo parti di e konsepto Micro Public Private Partnership (Micro PPP). E aña aki no ta un eksepshon. Proyekto Micro PPP “Ban Biba Barber” ta konsistí di 20 bibienda i tin dos diferente kontratista ku lo traha e kasnan; Creative Innovative Property Services (CIPS) i Girasol Development. Kada kontratista lo traha 10 kas i kada kontratista tin diferente modèl di kas pa ofres’é.  Personanan ku ta interesá por pasa na Domeinbeheer tuma formulario di splikashon i inskripshon. Mester tene kuenta si ku tin kriterionan ku kada interesado mester kumpli kuné pa por yega na remarke pa un di e kasnan aki. Personanan ku ta riba lista di espera di Domeinbeheer pa un tereno di gobièrnu promé ku 30 di yüni 2018 tin preferensha.

Ku e proyektonan Micro PPP Domeinbeheer ta rekonosé e nesesidat ku tin bou di un klase spesífiko di siudadanonan ku ke i por paga un kas propio na un preis rasonabel. Ta trata di ‘diferente tipo di kasnan ku preis kuminsando for di NAf. 115.000,- Preis pa kas ta varia dependiente di e grandura di e kas, e kantidat di kamber i kantidat di baño ku interesado ta deseá.

Den e skema por tuma nota di kada modèl, nan preis i grandura.

 

CIPS

Nòmber di kas Tamaño Preis (inkl. OB)
Progreso 63 m² NAf. 115.000,-
Progreso Plus 63 m²+ 21m² (fundeshi pa sigui konstruí segun forsa) NAf. 130.000,-
Sosiegu 85 m² NAf. 160.000,-
Trankilidat 98 m² NAf. 185.000,-
Bista 120 m² NAf. 225.000,-

 

Girasol Development

Nòmber di kas Tamaño Preis (inkl. OB)
Model A 70 m² NAf. 125.000,-
Model B 90 m² NAf. 150.000,-
Model C 111 m² NAf. 185.000,-
Model D 129 m² NAf. 225.000,-

Progreso Plus
E kas ‘Progreso Plus’ di CIPS ta basá riba e konsepto ‘Bo kas na bo Midí!’ ku Domeinbeheer a introdusí na Sapaté na aña 2016. E tipo di kas aki ta brinda e posibilidat pa e kumpradó mes ekspandé ku un kamber òf un baño mas segun nesesidat i segun forsa. Ora e kumpradó kumpra e kas, e ta risibi’é ku e fundeshi di e kas kompletu, pues alabes ku e fundeshi kla pa e hasi su ekspanshon.


Lista di kriterio

Personanan ku ta interesá den un di e kasnan di e proyekto ‘Ban Biba Barber’ mester kumpli ku sierto kriterionan pa por bin na remarke. Por ehèmpel, interesado mester ta registrá na kranshi komo habitante di Kòrsou (inskribí) i e no mag di tin mas bien inmóbil manera kas òf tereno registrá na su nòmber. Por pasa libremente na Domeinbeheer i tuma e formulario ku tur informashon tokante di kriterianan pa por bin na remarke di un di e kasnan.

Ademas mester tene na kuenta ku personanan ku ta riba lista di espera di Domeinbeheer pa un tereno di gobièrnu promé ku 30 di yüni 2018 tin preferensha pa bin na remarke pa un di e kasnan. Sinembargo personanan ku no ta riba lista di espera tambe por apliká.

Pa mas informashon tuma kontakto ku Domeinbeheer na 0800-1919, bishitá Facebook page Domeinbeheer – Tereno pa Tur, òf pasa personalmente na Sentro di Servisio Domeinbeheer. Sentro di Servisio Domeinbeheer ta habrí di djaluna pa djabièrnè entre 8or di mainta pa 4or di atardi ‘non-stop’.

 

Advertisements

Skibi bo komentario / Opinion

This site uses Akismet to reduce spam. Learn how your comment data is processed.

error: Content is protected !!
%d bloggers like this: