Advertisements

Preguntanan relashoná ku e proseso pa inskribí muchanan na skol i aña eskolar nobo di 2018 pa 2019

Na: Minister di OWCS

Sra. Marilyn Alcala-Walle

PRESENTE

 

Kòrsou, 09 di yüli 2018

Tópiko: Preguntanan relashoná ku e proseso pa inskribí muchanan

na skol i aña eskolar nobo di 2018 pa 2019

 

Honorabel Sra. Alcala- Walle,

 

Nos hóbennan a kaba di terminá un periodo eskolar, kaminda un biaha mas e aña eskolar ku a kaba di transkurí no a bai sin su problemanan, lokual ta un preokupashon serio serka frakshon di MFK.

 

Na diferente okashon nos a aserka señora Minister ku preguntanan i tambe durante nos intervenshonnan den Parlamento nos a ekspresá nos preokupashon pa e diferente aspektonan den nos enseñansa ku tin falta atenshon i tambe aspektonan kaminda maneho pa un mihó sistema di enseñansa no ta esun di mas korekto.

 

Ya nos a wòrdu aserka pa diferente mayor i maestronan ku sierto preokupashon pa loke ta trata e aña eskolar nobo ku nos ta bai drenta. E aserkamentu di mayor i maestronan i nos konstante bon boluntat pa apesar di tur kos duna nos kontribushon pa optimalisashon di nos enseñansa i den e kaso aki spesífikamente pa e aña eskolar 2018 pa 2019 por tin ménos problema, nos ta aserka minister ku e siguiente preguntanan, hasiendo uso di artíkulo 96 di reglamentu di órden di Parlamento.

 

Preguntanan;

 

  1. Minister por informá Parlamento kuantu mucha a slag di enseñansa di básiko pa skol di fundeshi?

 

  1. Tin kupo na e diferente skolnan di fundeshi pa e kantidat di muchanan ku ta bai drenta den e promé aña eskolar na nivel di skol di fundeshi?

 

  1. Si kontesta na pregunta 2 ta afirmativo, Minister por splika Parlamento ta dikon na e momentonan aki mayornan ta pasando den problema pa haña kupo pa nan yunan na e diferente skolnan di fundeshi?

 

  1. Minister por informá Parlamento konforme lei, kuantu ta e máksimo i mínimo kantidat di mucha ku por tin den kada klas di e promé aña di skol di fundeshi?

 

  1. Minister Alcala-Walle ta na altura ku tin skolnan ku pa motibunan sosial, emoshonal di nos hóbennan a disidí ku ta baha e kantidat di hóbennan ku nan ta tuma den e promé aña di skol di fundeshi. Pa asina por tin un mihó ambiente i nivel pa e maestronan por duna lès?

 

  1. Minister por indiká na Parlamento si ta premirá ku pa aña eskolar

2018 – 2019 lo tin skarsedat di maestro?

 

  1. Kua ta entidat ku na e momentonan aki ta enkargá ku formashon di dosentenan di e diferente nivelnan di enseñansa aki na Kòrsou?

 

  1. Kuantu maestro a wòrdu forma i a drenta e proseso laboral for di 2012 te ku 2017?

 

  1. Kuantu maestro lo wòrdu forma pa drenta e proseso laboral entre 2018 pa 2021?

 

  1. Minister por duna un bista pa aña, for di 2012 te ku 2017 kuantu maestro tabata laborá i na kua nivel di nos enseñansa?

 

  1. Minister por duna un bista pa aña, for di 2012 te ku 2017 kuantu skol tabata tin aktivo pa duna enseñansa i na kua nivel di nos enseñansa?

 

  1. Minister Alcala-Walle tin un plan kon pa trese interes bek serka nos hóbennan pa skohe pa studia pa bira maestro di skol, pa por garantisá kontinuidat den nos enseñansa?

 

  1. Enseñansa liber lo ta vigente sin ningun redukshon finansiero i/òf edukashonal pa e próksimo aña eskolar?

 

  1. Enseñansa den region lo ta vigente sin ningun adaptashon i/òf forma di deskriminashon pa loke ta trata nivel di enseñansa pa e próksimo aña eskolar?

 

  1. Minister por informa si Feffyk su portanan lo ta habri pa aña eskolar 2018 – 2019, pa risibí hóbennan ku kier sigui kursonan di fishi?

 

Frakshon di MFK representá den e kaso aki pa Parlamentario Gilbert Doran ta spera di haña kontesta mas pronto ku ta posibel, pa asina alumnonan, dosentenan i pueblo di Kòrsou por wòrdu informá riba komienso di un aña eskolar nobo i nan por tin trankilidat ku esaki lo kuminsa sin ningun problema.

 

Atentamente,

Gilbert Doran

Miembro di Parlamento

Frakshon di MFK

 

 

 

 

 

Na: Presidente di Parlamento di Kòrsou

Sr. W. Millerson

Wilhelminaplein # 4

PRESENTE

 

Kòrsou, 09 di yuli 2018

 

Apresiabel Sr. Millerson,

 

Pa medio di e karta aki, hasiendo uso di artíkulo 96 di reglamentu di órden

di Parlamento, mi ke pidi bo persona pa dirigí e karta athunto na Minister Marilyn Alcala-Walle enkargá ku OWCS, ku preguntanan ku mi persona ta hasi na e minister konserní.

 

Danki pa e koperashon.

 

Atentamente,

Gilbert Doran

Miembro di Parlamento

Frakshon di MFK

 

 

Advertisements

Skibi bo komentario / Opinion

This site uses Akismet to reduce spam. Learn how your comment data is processed.

error: Content is protected !!
%d bloggers like this: