Advertisements

CUANTO E “KARTELHEFFING” DI OTMAR LO BAY COSTA CADA UN DI NOS?

Booshi Wever di UPP:

 

CUANTO E “KARTELHEFFING” DI OTMAR LO BAY COSTA CADA UN DI NOS?

Aruba ta den “crisis”, pero ta parce no pa sr. Otmar Oduber. E plannan macabro di e minister pa adapta e maneho di desperdicio lo bay nifica introduccion di un otro “heffing”, den e caso aki un “kartelheffing”,
cu lo bin riba e gastonan cu e “crisisheffing” ya caba lo bay costa cada un ciudadano di Aruba.

Maneho di desperdicio conoce diferente pasonan. E  ta un cadena cu ta cuminsa cu preparacion debido di e pueblo di parti di gobierno. E siguiente pasonan ta encera recoge e desperdicio (Serlimar), sigui pa
e forma con ta deshaci di e desperdicio (dump na Parkietenbos y Sero y pronto na Pos Chikito) y finalmente incorpora un control debido pa evita cu e consumidor no ta cumpli cu e reglanan stipula pa ley.
Otmar Oduber deliberadamente a scoge pa fragmenta e proceso di maneho di desperdicio probablemente cu e meta pa logra su obhetivo di saca mayor probecho financiero di maneho di desperdicio na Aruba, pa faborece miembronan di e cartel. Y mirando cu  ta sera contractonan miyonario cu amigonan, sponsornan (sin ningun forma di destaho) y alabes “fixed-bidding” pa p.e. tanto e leasemento di e 22 trucknan como manera ta mustra e “Waste To Energy” por medio di un incinerator, nos ta yega na e conclusion cu e minister ta formando un otro CARTEL y cu lo ta necesario bin cu un “kartelheffing” (banda di e “crisisheffing”)riba lomba di pueblo, pa por paga e proyectonan di amiguitonan di e minister, pasobra nos tur sa cu gobierno mes no tin espacio financiero pa carga
esaki. Y e ultimo aki ta wordo enfatisa mas den un declaracion  recientemente haci dor di un di e directoranan di Serlimar cu a bisa cla y raspa cu TUR gasto di Serlimar al final ta pueblo lo mester bai paga. Ela bisa cu hopi enfasis “de vervuiler, betaalt”!!
Ta pa e motibo aki,UPP a tuma a iniciativa pa haci un calculacion cuanto cada parti di e fragmentacion aki lo bay costa nos pueblo. Den e calculacion aki a tuma como punto di salida cu tin 35 mil hogar na
Aruba total. Na 2015 cada hogar na Aruba a cuminsa paga 25 florin(exclui bbo etc etc) na Serlimar pa recoge desperdicio. Maneho di desperdicio lo bay conoce un aumento di costo den tres etapa.
Pa cuminsa na e di dos mitar di 2018 lo bay huur un edificio na Pos Chikito, pa loke no tabata tin ningun forma di destaho. Lo paga Ecogas pa procesa e sushi cu Serlimar a recolecta (aki tampoco tabata tin un
destaho). Ta huur di 3 loader, gastonan operacional y finalmente e “liners” cu a lubida di pone na e landfill coba na Ser’i Teishi (pa esakinan  tampoco tabatatin destaho at all).  Alabes minister a indica cu lo aumenta e cantidad di personal di 40 pa 100 hende. UPP ta asumi cu esaki lo nifica un aumento di alrededor di 10 florin extra pa luna, pues 35 florin(exl.BBO,BAZV y BAVP/POR) cu cada hogar lo mester paga na2018 caba.
E di dos aumento lo surgi na 2019 ora cu mester cuminsa paga pa e lease di e 22 trucknan y mas e otronan cu lo keda den uso. E maniobra aki di e minister lo nifica un otro aumento di 10 florin. Pues cada
hogar lo mester paga alrededor di 35 + 10 florin = 45 florin (excl. BBO,BAZV,BAVP/POR) pa luna na 2019.
Aki sinembargo e fiesta no a caba, pasobra na 2020 lo bin e inversion mas grandi ainda cu ta e “Waste to Energy (WTE)” pa medio di un incinerator. E “sprookje” WTE por medio di incinerator  lo nifica un inversion entre 150 miyon y 200 miyon dollar. Saliendo for di e hecho cu lo no por tin PPP mas, Serlimar lo mester bay fia e placa pa cumpra esaki. Ban haci un calculacion conservativo cu lo bay cumpra uno di
175 miyon dollar, cu ta 320 miyon florin na un interes di 2%  pa paga back den 30 aña. Esaki ta nifica cu lo mester bay paga pa aña 10.880.000,= florin na “afbetaling”. Y teniendo na cuenta cu e gastonan operacional pa tipo di instalacionnan aki, esakinan  lo no baha bou di 18 miyon florin pa aña.

Otmar Oduber a bisa cu tin pura cu esaki y cu lo dura 2 aña pa pone e planta aki “up-running”, pues nos por calcula cu na 2020  cada hogar na Aruba lo bay conoce un aumento minimo di 65 florin. Lo mester paga 45 + 65 florin = 110 florin pa luna (excl. BBO,BAZV,BAVP/POR).
Den e grafico nos ta duna un bista di e aumento barbaro cu e capricho di Otmar lo bay costa cada hogar na Aruba. Esaki ta nifica un aumento significativo di alrededor di 85 florin pa luna. Mientras cu MEP y RED mester hala faha mara, ta parce cu Otmar Oduber no tabata den e Ministerraad dia cu a tuma e desicion pa hala faha mara, e ta sigui faborece su sponsornan y amigonan cu ta  forma parti di e Cartel. Pues un aumento monstruoso di 440%. E pueblo mester sufri pa e miembronan di e cartel sigui djo-djo hunto cu Otmar y POR.

Pa finalisa lo siguiente. Na prome lugar mester tene cuenta cu e calculacion haci ta uno basta conservativo y no tur gasto por a wordo inclui den e suma total. Pues no lo straña nos si na final di cuenta e suma lo por yega  un montante mucho mas halto. P’esey por ta cu Otmar Oduber no kier presenta un plan integral, pasobra e ora si lo mester responsabilisa cada trajecto di e maneho di desperdicio na placa chikito? Mas importante ta cu gran parti di nos pueblo ta biba den pobresa of ta den un posicion vulnerabel pa pobresa. UPP a tuma nota di un estudio presenta door di CBS recientemente na unda alrededor di 15.9% di nos poblacion ta sufri bou di pobresa severo of modera y un otro 19.1% ta vulnerabel pa cay den pobresa. Con nan lo bay absorba e gastonan cu e “crisisheffing” y e “kartelheffing” lo bay nifica?

P’esey UPP ta di opinion cu no ta husto cu sin mas gobierno y parlamento ta bay di acuerdo pa sigui aumenta e sacrificio financiero di e pueblo. No ta esaki a sosode e ultimo 8 añanan na unda a derocha
placa pa faborece sponsornan, famia y amigo y al final ta pueblo mester bai paga? Ta pesey UPP no por acepta e “Kartelheffing” aki pa e pachanga sigui cu pueblo no ta invita pa participa pero si lo mester
bai paga pe. Ta spera cu Parlamentarionan,gremionan sindical y comercial tuma nota di esaki y lanta riba y bisa den koor: TA BASTA! NO POR! STOP CORUPCION AWOR!

 

Booshi Wever

Lider partido UPP

16 juni 2018

Advertisements
error: Content is protected !!
%d bloggers like this: