Advertisements

Minister Suzy Camelia-Römer, di Salú, Medio Ambiente i Naturalesa ta organisá e promé ‘International Congress on Traditional, Complementary & Integrative Medicine’ na Kòrsou ku oradornan internashonal i lokal

Minister Suzy Camelia-Römer, di Salú, Medio Ambiente i Naturalesa ta organisá e promé ‘International Congress on Traditional, Complementary & Integrative Medicine’ na Kòrsou ku oradornan internashonal i lokal

 

WILLEMSTAD- Dia 22 i 23 di yüni próksimo, Minister Suzy Camelia-Römer huntu ku su Ministerio di Salubridat, Medio Ambiente i Naturalesa ta organisá un kongreso tokante  integrashon di Medisina Tradishonal, Komplementario i Integrativo den nos sistema di salubridat. Den e kuadro aki a invitá oradórnan lokal i internashonal di entre otro Colombia, Hulanda, India i tambe representashon di  e Organisashon Mundial di Salú (OMS/WHO) i e organisashon di salú di nos region di Amérika i Karibe, esta  Pan American Health Organisation (PAHO) pa kompartí nan vishon, konosementu  i ekspertisio riba e tema.

Manera palabrá den e programa di gobernashon di gobièrnu formanan di Medisina Tradishional, Komplementario & Integrativo (MTK&I i na Ingles Traditional, Complementary & Integrative Medicine, esta: TC&IM) ta parti di e vishon ku gobièrnu di Kòrsou ke konkretisá riba termino korto. E vishon di gobièrnu ta pas den e vishon i strategia di Organisashon Mundial di Salú (OMS) , ku ta enfatisá ku e tradishon di un pueblo pa tratamentu di salú, por ehèmpel ku yerba i otro sistemanan natural mester keda inkorporá den e sistema formal di salú di e pais. Minister Camelia-Römer komo Minister enkargá ku salú públiko tin e tarea pa implementá e vishon aki i ta enfatisá ku kada hende meresé un estado físiko, mental, emoshonal i spiritual salú pa por forma parti di un sosiedat sano.

Komo parti di e trayekto pa yega na e meta menshoná, señora Minister Camelia-Römer a instalá un grupo di trabou di “Wellness” ku tin e tarea pa kordiná, guia i desaroyá e base legal pa  regulashon di praktiká, praktikádo i produktonan (PPP) di sistemanan di kuido i medisina tradishonal, komplemetario i integrativo. Mas aleu, resientemente Minister Camelia-Römer realisá un viahe di trabou na Macau SAR, China i a partisipá na un workshop di tres dia organisá pa OMS ku a trata integrashon apropiá di MTK&I den paisnan su sistema di salú i servisionan di salú, garantisando seguridat p’e pashènt dor di regulashon i legislashon i kontrol riba kalidat.

Ku e empeño pa informá stakeholder-nan lokal i komunidat en general, a organisá e kongreso ku e meta pa a base di konosementu i eksperensia di ekspertonan lokal i internashonal i e mihó práktikanan den otro pais, hiba un diskushon ku mente habrí riba e oportunidat pa integrá MTK&I di un manera responsabel  den e sistema di salubridat di Kòrsou.

Presentadornan lo ta entre otro, dr. E. Bolastig i dr. Daniel Gallego representando Pan American Health Organisation (PAHO);  dr. Sangyoung AHN representando e Organisashon Mundial di Salú (OMS/WHO);  señora Goethart di Vereniging van Natuurgeneeskundige Therapeuten di Hulanda, dr. Pooja di universidat di Ayurveda Chaudhary Brahm Prakash Ayurvedic Charak Sansthan di New Delhi, India; dr. Pombo Ospina di Universidat Juan N. Corpas di Colombia; i di Kòrsou nos tin señora Dinah Veeris, konosedó di yerbana;  señor Kenneth van Eer, terapeuta i presidente di Algemene Vereniging voor Natuurgeneeswijze di Kòrsou; Profesor dr. Sirving  Keli MD, Ph.D.; direktor di Sektor di Salú na Ministerio di Salubridat, Medio Ambiente i Naturalesa, señora Jeanine Constancia-Kook MSc.; Direktor di Maneho na Ministerio Salubridat, Medio Ambiente i Naturalesa; dr. Jan Huurman, Inspektor General di Salú; i dr. Yves Schoop i sra Kora Juliana di e grupo di trabou di Wellness instalá pa gobièrnu. Na final lo tin un seshon di diskushon kaminda públiko por interkambiá ku e diferente presentadónan.

Djabièrnè 22 di yüni proksímo ta apertura di e kongreso di 6 or atardi pa 10 or di anochi den e sala “Atrium” na Renaissance Curacao Resort & Casino. Djasabra 23 di yuni ta kontinuá for di 9 or di mainta te 1 or di merdia. Entrada ta gratis i por registrá via email:  congress.tcim@gmail.com òf yama number di telefon 4325802/4325807. Di antemano minister Camelia-Römer ta gradisí pueblo di Kòsou pa e sostén i partisipashon na “International Congress on Traditional, Complementary & Integrative Medicine”.

Advertisements

One thought on “Minister Suzy Camelia-Römer, di Salú, Medio Ambiente i Naturalesa ta organisá e promé ‘International Congress on Traditional, Complementary & Integrative Medicine’ na Kòrsou ku oradornan internashonal i lokal

Skibi bo komentario / Opinion

This site uses Akismet to reduce spam. Learn how your comment data is processed.

error: Content is protected !!
%d bloggers like this: