Advertisements

Festival Ban Kanta Nos Boneiru

Festival Ban Kanta Nos Boneiru

 Fundashon Streanan di Boneiru e aña aki ta bai organisá un bia mas e festival Ban kanta nos Boneiru, ku partisipashon di tantu adultonan nos hóbennan. Pa partisipashon na e festival hubenil, e hóben mester ta entre 6 pa 17 aña i partisipashon na e festival grandi ta di 18 aña bai ariba.

Djasabra 11 di ougùstùs 2018 e festival grandi ta tuma lugá i djadumingu 12 di ougùstùs 2018 e festival hubenil. Sitio di e festival lo bira konosí mas despues

Meta prinsipal di e festival aki ta pa nos promové tantu kompositornan, areglistanan i kantantenan, alabes duna realse na e.o nos kultura, patriotismo, kustumbernan, norma i balornan.

Pa loke ta trata e orkesta, lo  hasi uso un biaha mas di Orkesta Streanan di Boneiru bou di direkshon di sr. Dwight Leoneta. E konstelashon ta konsistí di músikonan profeshonal i ku ta dominá e siguiente instrumentonan:

1 Piano, 1 Bass, 1 Key Board (strings) (opshonal), 1 Drùms/Timbal, 1 Konga, 1 Bongo/Kampana/Perkushon menor, 2 Trompèt, 2 Trombon, 1 Tenor/Alt Sax 3 Korista (Alto, Tenor i Bass)

E aña aki un bia mas tin e oportunidat pa tantu Bonerianonan biba pafó di Boneiru òf personanan no Boneriano biba pafó di Boneiru, tambe por partisipá na e festival aki, sea komo kompositor di letra òf areglista.

Pa loke ta trata e kantante, e por ta un Boneriano biba pafó di Boneiru òf un persona residensia na Boneiru.

Pa loke ta e premiashon, e aña aki tambe ta bai tin premio pa tur kompositor di letra i tambe tur areglista di tantu e ganadornan komo e finalista nan.

Nos fundashon ta spera ku e aña aki atrobe nos lo tin gran kantidat di artistanan tantu adulto komo hubenil ku lo partisipá na e festival aki sea komo kantante, kompositor di letra òf areglista.

Pa formulario di inskripshon i tambe e reglanan, por risibí esaki nan na Joshantie’s Bookstore den Kaya Grandi i na Sekshon di Kultura Arte i Literatura (SKAL).

Pa mas informashon por yama telefon 560 7070 òf por manda un e- mail na: festival.kantaboneiru@gmail.com

Sra. Judith Leoneta

Presidente.

====================

Reglanan

Festival Ban Kanta Nos Boneiru 2018

  • Formulario di inskripshon:
  • Na momentu ku entregá e formulario di inskripshon, e formulario mester ta kompletamente yena i firma
  • Último dia di inskripshon ta djarason 4 di yüli 2018.
  • Letra:
    • E kompositor mester relashoná su letranan ku nos isla Boneiru i por trata diferente tema manera e.o. kultura, historia, norma i balornan, patriotismo i kustumbernan
    • Mirando ku e festival ta enkonekshon ku dia di Boneiru, kontenido di e kansion por ta relashoná ku e dia aki, pero tene kuenta ku no nesesariamente esaki ta mara na e dia ariba menshoná (tene kuenta ku e dia aki ta dia di Boneiru i no dia di himno i bandera di Boneiru. Pero naturalmente por hasi menshon di nos bandera i himno)
    • E kansion mester ta nobo i no – editá
    • E komposishon mester ta na un bon papiamentu. Palabranan di otro idioma ku a bira parti di nos idioma papiamentu, tambe ta permití
    • Letranan mester ta propio
    • No ta permití hasi uso di palabranan insolente o bulgar. Ni tampoko hasi menshon di palabranan insolente i bulgar dirigí na instansianan finansiero/ mandatario. Esaki ta debí ku gobièrnu i tin instansianan ku ta kontribuí i por e kai den mal tera
    • Letranan por wòrdu entrega riba un A4 (di tek), “memory stick” , cd i tambe por mail esakinan na fesitival.kantaboneiru@gmail.com
  • Entrega di letra:
    • Tur partisipante ku ta partisipá na Festival Ban kanta Nos Boneiru 2018 mester entregá un grabashon (guia) di e piesa, kantá pa e intérprete i kompañá pa un instrumènt di kuèrdè pa mas tardá djaluna 10 di yüli 2018 te ku 9or anochi na

Kaya Valdivia 1 Tera Kòrá of via mail na festival.kantaboneiru@gmail.com

Huntu ku e grabashon mester entrega e skor i partituranan di un sekshon di metal

  • Melodia:
  • E melodia ta keda na kada kompositor di melodia
  • Hasi uso di bo kreatividat i trese melodianan moderno
  • Areglo:
  • E areglo mester ta kreativo, original, apart, komprendibel, bunita i no mester ta parse kansionnan eksistente
  • E aspekto musikal: harmonia, dinámika, klave mester ta hopi bon
  • E areglo ta funshonal den e kansion. E relashon entre e diferente komponentenan ta bon.
  • Bon sinkronisashon entre e komposishon kantante, agrupashon musikal i areglo di parti agrupashon musikal
  • Areglista tin ku tene kuenta ku abilidatnan vokal di e kantante
  • Durashon:
  • Un kansion por dura un máksimo di 6 minüt
  • Presidente di hurado lo dedusí 2 punto pa kada sekònde riba 6 minüt.

Despues di 6 minüt i 30 sekònde lo kita e zonido i esaki ta bai den forma lus kòrá

  • E konstelashon di orkesta:
    • 1 Piano
    • 1 Key Board (strings) (opshonal)
    • 1 Bass
    • 1 Drùms/Timbal
    • 1 Konga
    • 1 Bongo/Kampana/Perkushon menor
    • 2 Trompèt
    • 2 Trombon
    • 3 Korista (Alto, Tenor i Bass)
  • Loke hurado ta husga:
  • E hurado lo husga di kada komposishon:
  • Letra;
  • Melodia;
  • Entonashon;
  • Areglo
  • Komo ku ta trata di un festival di kansion, letra i melodia ta e kategoria ku ta mas pisá.
  • Despues di presentashon di tur komposishon, ta saka 6 komposishon ku a klasifiká. E seis klasifikadónan aki ta bolbe presentá pa asina saka e resultado final.

N.B. No ta tur seis komposishon ku a klasifiká ta sali den e resultado final.

 

E resultado final ta e siguiente premionan:

Areglista:

  • Mihó areglista
  • 1e finalista
  • 2e finalista
  • 3e finalista

N.B. e sekuensia di e resultado di areglista, por resultá di no ta den e mesun sekuensia ku e resultado di e komposishonnan ( finalista i  ganadornan).

Kompositor di letra:

  • Mihó kompositor di letra
  • 1e finalista kompositor di letra
  • 2e finalista kompositor di letra
  • 3e finalista kompositor di letra

Finalista i ganadornan:

  • Mas popular
  • Mihó aktuashon
  • 3e finalista
  • 2e finalista
  • 1e finalista
  • Ganador apsoluto

 Ensayonan:

    • Tur intérprete mester partisipá na tur e ensayo i na ora i den e espasio di tempu stipulá.
    • Tempu di ensayo ta lo siguiente:
  • promé bia: 45 minüt;
  • di dos bia: 30 minüt;
  • di tres bia: 15 minüt ;
  • ensayo general 1 te dos bia e mesun piesa.
    • E direktor general ta responsabel pa kordiná tur ensayo.
    • Durante e “soundchek” tur número lo wòrdu pasá 1 biaha
  • Presentashonnan despues di festival:
  • Riba dia di Boneiru ganador, 1e finalista i 2e finalista di tur dos festival lo presentá den e programa ofisial di Dia di Boneiru organisá pa Gobièrnu di Boneiru. Tur interpret’é ta keda informá dor di organisashon ku a organisá Festival di Ban Kanta Nos Boneiru tokante e presentashon aki i tur kansion ta keda interpretá riba pista.
  • Disiplina i rèspèt pa otro:
    • Aunke Festival Ban Kanta nos Boneiru ta un festival di kompetensia, mester tene na kuenta ku ta trata aki di un evento positivo pa desaroyo general di nos isla. Tur partisipante, kompositor mester mantené un alto grado di disiplina i tambe desensia i kompañerismo, apoyando tur kolega partisipante den nan presentashon. Ta bon pa menshoná aki tambe ku partisipantenan mester instruí nan fanátiko nan pa na promé lugá apoyá nan partisipashon, pero tambe pa aploudí tur demas partisipantenan.
    • Respetá desishon di hurado

 

 

Advertisements
%d bloggers like this: