Advertisements

BANKO DI SANGER KU ‘DONOR DRIVE’ DI 11 PA 15 DI YÜNI Yamada na komunidat pa registrá pa bira donante

BANKO DI SANGER KU ‘DONOR DRIVE’ DI 11 PA 15 DI YÜNI

Yamada na komunidat pa registrá pa bira donante

 

WILLEMSTAD – Den kuadro di Dia Mundial di Donante di Sanger, Banko di Sanger Kòrsou resientemente a lansa un kampaña di konsientisashon pa stimulá nos komunidat pa bira donante.

Mester tuma akshon rápido pa e kantidat di donante no baha mas tantu. Pa bira donante mester registrá i despues di esei ta sigui un kontròl médiko ku Banko di Sanger ta hasi. Si e tèstnan ei bai bon e persona por bira un donante. Pa logra haña mas tantu hende pa registrá Banko di Sanger ta organisá un ‘donor drive’ di djaluna 11 pa djabièrnè 15 di yüni kaminda e banko ta keda habrí te 6:30 pm pa registrá donante nobo i risibí donashon di sanger. Esaki ta pa duna espasio na personanan ku ta traha te atardi i no tin espasio durante di dia pa yega Banko di Sanger.

Djasabra 16 di yüni lo tin un Dia Habri na Banko di Sanger na Pater Euwensweg ya asina mas tantu hende por sera konosí ku e banko, tur e aparatonan sofistiká, e laboratorio i e proseso ku e sanger ta pasa aden for di e momento ku e donante hasi donashon di sanger.

Un i tur ta bon biní pa pasa i registrá pa bira donante di Banko di Sanger di Kòrsou. Bo donashon boluntario di sanger por salba 3 bida!

Advertisements
%d bloggers like this: