Advertisements

Banco di Caribe ta aportá pa di 4 aña konsekutivo na proyekto ‘Bayena i Dòlfein’ di Dolphin Academy

Banco di Caribe ta aportá pa di 4 aña konsekutivo

na proyekto ‘Bayena i Dòlfein’ di Dolphin Academy

 

WILLEMSTAD- YÜNI 2018:  Tabata djaluna último ku Banco di Caribe a bolbe konfirmá su kompromiso ku e programa di ‘Bayena i Dòlfein’ di Dolphin Academy.  Esaki ta e di 4 aña konsekutivo ku Banco di Caribe ta aportá na e programa aki. E aña aki Banco di Caribe a adoptá tres klas, di tres diferente skol básiko pa nan tin e oportunidat di partisipá na e programa edukativo di Dolphin Academy.  E skolnan ta M.C. Piar School, Blenchi School i St. Joris College.

 

Ya ta 13 aña ku muchanan di Kòrsou ta risibí e oportunidat pa partisipá na e proyekto di Dolphin Academy. E meta, ta pa duna tur mucha di Kòrsou informashon tokante bayena i dòlfein, bida marítimo i kon pa konservá esaki. E muchanan ta haña lès na Dolphin Academy mes, i tambe na nan propio skol.  Durante di e mainta edukativo na Dolphin Academy e muchanan ta mira algun pelíkula di dòlfein, presensiá entrenamentu di e dòlfeinnan, haña sunchi di dòlfein i tuma nota di e señalnan ku entrenadó ta duna na e dòlfein durante di kada funshon.  Miéntras ku na skol nan ta risibí e parti teorétiko.

 

Djaluna último Sr. Dito de Kort , managing director di  Banco di Caribe a bishitá skol básiko M.C. Piar pa tuma nota di e lèsnan i dirigí algun palabra na e muchanan. Banco di Caribe ta deseá e muchanan hopi éksito i ta kontentu di por aportá na programa edukativo di Dolphin Academy.

Advertisements
%d bloggers like this: