Advertisements

SPROOKJE DI MIKE EMAN “NIET SNOEIEN, MAAR GROEIEN” TA NA ORDO DI DIA!!

Booshi Wever di UPP:

SPROOKJE DI MIKE EMAN “NIET SNOEIEN, MAAR GROEIEN” TA NA ORDO DI DIA!!

Den e ultimo dianan nos mester constata cu e “spin-doctors” di e gobierno actual ta draai “op volle toeren”! E machinaria di propaganda cu nos a conoce e ultimo 8 añanan a wordo poni den funccion. Esakipa purba di hustifica e derochamento di placa sin fin cu tin den e gobierno aki.

Nos mester constata cu no tin coherencia den gobernacion. Por ehempel di un banda e nombracionnan politico ta tuma lugar sin fin y di otro banda ta papia di kita hende for di trabou. Nos tur sa cu e gobierno anterior a nombra masha hopi hende sin esaki tabata necesario. Nos a tende e Minister Presidente declara den parlamento cu ela kita 300 y pico y CAFT den su raport ta bisa cu ya caba den e
prome 3 luna di e aña aki a surpasa e begroting di 2017. Con esaki ta posibel?
Alabes e Minister Presidente a bisa cu Hulanda ta poniendo presion pa kita hende. Incluso secretario di estado Raymon Knops e enfatisa esaki. Nos tur sa esey, esey sigur no ta un sorpresa. UPP a bisa esey den varios debate y nos a trece e pensamento cu mester “depolitisa” e manaho y nombramento di personal den gobierno y wak con pa baha e cantidad di personal gradualmente via natuurlijke afvloeiing, pero mas importante pa no crea mas departamento. Si mester bin un departamento y/o servicio esaki mester sosode via un ley na unda ta stipula tambe cuanto hende mester pa laga e departamento por opera. Loke nos ta mira cu e gobierno aki ta nombra hende pa loco y ya caba a bin cu por lo menos dos servicio of departamento. Pues aki no por papia di “SNOEIEN”!

Loke tambe a resalta ta e hecho cu e machinaria di propaganda ta hacieno nan maximo esfuerzo pa hustifica e mudamento di Serlimar di SanNicolas pa Pos Chikito. Un MEGA-gasto extra cu al final Pueblo lo mester bai paga. Y esaki djies pa yena saco di un di e financistanan mas grandi di POR. Esaki lo bai costa pueblo un 600.000,= bubu extra pa aña. Y Pos Chikito mester keda contento cu nan ta haya un muebleria back, di Pepeganga pa Muebleria Serlimar, unda lo bai ta recicla sushi den un bario habita.
Aki tampoco nos por bisa cu ta “SNOEI” pero mas bien ta parce cu ta “KNOEI”  a costo di placa cu no tin, pa complace cu e amiguito di Otmar. Esaki no ta corupcion?

E otro asunto cu ta ser treci dilanti ta e asunto di “leasemento” di e 22 trucknan. Manera nos a bisa caba, e trucknan cu tin den uso awor por bai por lo menos 6 aña mas. Aki nos ta papia di por lo menos di
2.500.000,= bubu pa aña y pueblo mester bai scupi esaki.Nos a mustra caba con a “KNOEI” pa faborece un otro amiguito. Atrobe no a “SNOEI” pero si a “KNOEI”!!
Nos a tuma nota di un otro pakete di propaganda cu ta esun di e deal cu EcoGas, cu tin un silencio hermetico di cuanto e deal aki lo bai costa. Pero haciendo un calculacion conservativo y tuma e cifranan cu normalmente ta paga pa un procesamento y e empaketamento, nos ta yega hopi facil na por lo menos 2.400.000,= bubu pa aña. Aki a “SNOEI”? No ta parce.

E minister ta haci como sifuera cu lo no bai costa nada siendo un di e directoranan ta bisa cu eno sa cuanto esaki lo bai costa pero den todo caso ta pueblo lo mester bai paga. En todo caso mi no a lesa ningun caminda cu EcoGas a bira un instituto filantropico cu ta traha por nada.

E ultimo cu nos kier a toca,(paso tin hopi mas ehempel cu nos por menciona), ta e asunto di Waste to Energy. Nos a scirbi hopi tocante di esaki, pero nos kier a invita tur hende pa busca informacion al
respecto. Un cos nos por bisa cu no tin ni un instalacion asina ey cu ta funccionando den mundo henter sin subsidio ni problema. Es mas casi tur caminda nan ta serando esakinan pasobra e no ta e solucion. Dicon tur hende kier pa nos lubida cu tin un instalacion di Waste to Energy aki na Aruba cu a fracasa? Y esaki tambe tabata un “deal” hopi straño cu WEB tambe ta hinca pata pata aden. Miyones di placa di pueblo a bai perdi eyden. “Geen haan die ernaar kraait”. Dicon no ta hasi un investigacion? Of tin hende hopi cerca di e minister por sali malo for di esaki?  Prohibi pa lubida!!
Aki sigur lo no “SNOEI” y e unico manera cu por logra si bai “KNOEI” atrobe. E “sprookje” aki lo sali por lo menos 12.000.000,= pa aña pa opera y corda pa un “White-Elephant”!
Loke ta yena nos cu indignacion ta e hecho cu nos NO ta tendeindo nada di Parlamento, ta parce cu nan keto bai ta den “winterslaap” of “jet-lag” of nan ta pensa, “praten is zilver,maar zwijgen is goud”? Cu otro palabra; CANI MI,PAMI CANI BO!!
Ma pio ta e hecho cu nos ta ripara cu di parti di tanto Minister Presidente y di e Minister di Economia, nos tin cu tende cu mester hasi e inversionnan aki pa por tin un crecemento economico. Esey ta
zona conoci den mi oreanan. No ta esaki e contador di “SPROOKJES” mas grandi di Aruba, esta Mike Eman a bisa esey? No ta ela bisa 8 aña largo, “NIET SNOEIEN,MAAR GROEIEN”? Y pa colmo e a declara cu eta orguyoso di esey tambe. Kiko ta diferente awor?

Nos a mustra cu aparte di “NIET SNOEIEN” en todo caso a bin algo mas na cla, esta “KNOEIEN”, mi ta duda cu Otmar no a “KNOEI” tambe den e periodo cu e tabata orguyosamnente AVP/POR.
Lo no straña mi cu si Otmar bai reuni cu hendenan por ehempel cu ta traha caminda y drecha caminda pa yuda Aruba den esaki. Y pidi nan pa nan join(Cartel) y financia esaki y Gobierno ta paga nan poco poco. Pero nos no sa con esaki por ta posibel si no mag di tin mas PPP y e minister di Economia a bisa cu pronto lo bin e “Mededinginsautoriteit” cu lo mester evita “Cartel-vorming”?! Of Otmar lo bai duna tipo di maniobranan aki un otro nomber? Cuidow cu e reunion aki no a tumalugar caba!!

Mirando tur loke ta pasando nos no por saca un otro conclusion cu ta:
“NIET SNOEIEN,MAAR KNOEIEN, OOK NIET GROEIEN, MAAR WEL STOEIEN MET MEKAAR”!!

Booshi Wever

Lider partido UPP

10 juni 2018

Advertisements
%d bloggers like this: