Advertisements

Parlamentario Jeser El Ayoubi: “Realidat ta ku Kòrsou a pèrdè un oportunidat klave ku KTK PANAMA”

Parlamentario Jeser El Ayoubi: “Realidat ta ku Kòrsou a pèrdè un oportunidat klave ku KTK PANAMA”

 

Ken ta duda den Panamá su kapasidat i potensial den sektor industrial-marítimo?

Panamá un di e paisnan ku e haf mas grandi na mundu i ku un zona liber hopi aktivo kaminda desaroyonan di ampliashon ta sigui kontinuá tantu den Panamá Kanal komo zona liber te ku dia di awe.

 

Pa garantisá kontinuidat di nos haf ta nesesario pa tin un maneho ku vishon. Ta importante pa diversifiká e aktividatnan di nos haf riba plano internashonal pa asina tene e forsa laboral kontinuamente den moveshon. Alabes e diversifikashon aki ta eliminá e faktor di laga tur webu den un makutu dor di forma aliansa di trabou ku otro paisnan rònt mundu. Un di e kompanianan di mas importante pa kontinuidat di nos haf ta KTK (Kompania di Tou Kòrsou).

 

Pa ekspandé e trabounan di KTK i garantisá kontinuidat di e kompania den 2010 un opshon lógiko tabata Panamá. Awendia, 8 aña despues, Panamá Kanal ta un di e puertonan di transishon, doorvoerhaven, di mas grandi di mundu i alabes un di atrakshonnan turístiko di mas bishitá na mundu. Esaki ta resultado ora ta traha ku vishon i perseveransia.

 

Kòrsou su haf ta ideal komo “transit hup” den Karibe pa e.o Panamá Kanal, Latino Amérika, Merka, México, Cuba i otro islanan den Karibe.

Un oportunidat úniko ku KTK a pèrdè di por a bira e suministrador di mas importante pa e.o Karibe i latino Amérika i alabes e KTK  por tabata tin e flota di toubot di mas grandi i aktivo den region.

E último aki sigur si tene kuenta ku e kompania venezolano ku a bende e lisensia ku ne na 2010 a bai di 2 pa 6 toubot na Panamá den 2018 i te ku dia di awe ta ópera bou di e nòmber KTK Panamá.

 

Realidat ta ku na 2010 tabata tin un hunta di komisario sin vishon i sin noshon di e potensialnan ku Kòrsou por a ofresé den e mundu marítimo tantu lokal komo esun internashonal. Nos mes ta “skakmat” nos mes i esaki netamente na momentu ku mester a invertí tur esfuerso nesesario pa amplia e trabounan di KTK pero deliberadamente a opta pa hasi lo kontrali.

 

Awe nos por mira e kuenta presentá. Akshonnan ku a keda tumá den e forma aki  ta duna un bista ku e hunta di komisario di e tempu ei no a duna balor na e potensial ku KTK tin pa ofresé i alabes no tabata tin interes pa mantené  nòmber di Kòrsou internashonalmente konfiabel sin papia ainda di e divisanan ku Kòrsou a pèrdè na entrada.

 

Komo nota positivo, nos a komprondé ku aktualmente tin interes di algun kompania internashonal di toubot pa traha ku KTK.

Enbes di sigui pèrdè tempu den kritiká, mester demostrá e madures polítiko pa di e forma aki salbaguardiá kontinuidat di aktividatnan di haf en general i KTK en partikular i awor sí hasi tur esfuerso pa bolbe gana e konfiansa i rèspèt riba plano internashonal marítimo i saka lo máksimo pa Kòrsou.

Advertisements
%d bloggers like this: