Advertisements

MUCHA PA MUCHA TA BAI MUNDIAL 2018! DJASABRA 9 DI YÜNI DI 10’OR PA 6’OR NA TERENO DI FFK!

MUCHA PA MUCHA TA BAI MUNDIAL 2018! DJASABRA 9 DI YÜNI DI 10’OR PA 6’OR NA TERENO DI FFK!

Mucha pa Mucha ta un fundashon ku a wòrdu fundá na aña 2014 pa algun trahadó di e departamentu di mucha di Hospital St. Elisabeth. Pa medio di diferente ‘fundraising’ ku donashon, e fundashon aki ta logra rekoudá fondo pa asina kumpra aparato ku material pa e departamentu di mucha den hospital.

Meta di e fundashon aki ta pa hasi e estadia di e muchanan malu den hospital mas agradabel. Dor di kumpra aparato i materialnan ku ta duna e kuido di e muchanan mas balor.

E materialnan aki ta kosnan móbil ku por keda usa pa añanan largu. Esaki nan ke logra dor di hasi muchanan ku si ta salú konsiente ku e muchanan ku ta sufri di kebrante di salú mester di nan yudansa.

Den añanan anterior e Funadashon Mucha pa Mucha a organisá diferente aktividat pa yuda rekoudá fondo manera Mucha ta landa pa Mucha i awor den kuadro di Mundial 2018 na Rusia, lo tin e Mucha pa Mucha ta bai Mundial! Fundashon Mucha pa Mucha den koperashon ku FFK i Komishon Hubenil a organisá un torneo pa muchanan di kategoria U-9 (muchanan bou di 9 aña) i U-11 (muchanan bou di 11 aña). E torneo aki lo tuma lugá djasabra, 9 di yüni próksimo na tereno di FFK kumisando for di 10’or di mainta te ku 6’or di atardi.

Tin un total di 8 ekipo di kategoria U-9 ku U-11, áktivo den Kampionato Hubenil di FFK ku lo partisipá i kompetí ku otro durante e torneo aki. Kada un lo representá un ekipo ku ta den mundial di Rusia 2018.

Esaki nan ta;

  1. Atletiko Saliña (Brazil)
  2. Excellence School (Colombia)
  3. Fc Stallions (Bèlgíka)
  4. Jong Holland (Argentina)
  5. Scherpenheuvel (Portugal)
  6. Subt (Fransia)
  7. Vesta (Spaña)
  8. Inter Willemstad (Alemania)

 

Lo parti e tereno na dos i kada ekipo lo hunga kontra otro pareu. E partidonan lo tin un durashon di 10 minüt pa banda ku un pousa chikí mei mei. Miéntras e ekipo nan lo hunga ku 7 hungadó riba tereno.

Aparte di algun tremendo partido ku un i tur por disfrutá di dje, lo bai tin bon músika di un DJ ku lo animá, bouncer, popcorn, suikerspin i hopi mas. Tambe lo tin diferente lòt ku por kumpra pa por gana premionan manera; ‘day pass’ na Kunuku Resort, ‘voucer’ pa bar & ‘lunch’ na Porto Marie, entrada pa Sea Aquarium i diferente premio átraktivo mas.

Bar i kushina tambe lo ta bon surtí, pues ta abo so falta pa bin koperá ku e gran evento aki! Entrada lo ta fl. 2 so so pa tur hende.

 Un danki spesial na tur sponser ku a duna un man pa e evento aki tuma lugá:

 FFK, Pediashure, Nutricia, Fun Miles, Cinemark, Leañes, Coral Roof Terrace, Porto Marie, Karakter, Dolphin Academy, Sea Aquarium, MCB, Kunuku Resort, Coca-Cola, The solution Hair Studio, Rode Kruis, Zero Gravity, A Special Day, Unifit Sport…sin boso koperashon Fundashon Mucha pa Mucha no por a logra!

Fundashon Mucha pa Mucha i FFK ta warda bo!

Advertisements
%d bloggers like this: