Advertisements
window.dataLayer = window.dataLayer || []; function gtag(){dataLayer.push(arguments);} gtag('js', new Date()); gtag('config', 'UA-83616463-1');

Estudio “Bachelor in Human Resource Management” na Universidat di Kòrsou positivamente evaluá dor di NVAO

Estudio “Bachelor in Human Resource Management” na Universidat di Kòrsou positivamente evaluá dor di NVAO

Ku gran orguyo Fakultat di Siensianan Sosial i Ekonómiko di Universidat di Kòrsou Dr. Moises da Costa Gomez (UoC) ta anunsiá ku su estudio “Bachelor in Human Resource Management” (BHRM) a ser positivamente evaluá dor di NVAO (Nederlands-Vlaamse Accreditatie Organisatie). Na febrüari 2018 un panel internashonal di NVAO a bishitá UoC i a evaluá e programa. E panel i despues e direktiva di NVAO a evaluá e estudio aki positivamente riba tur diesun standart di kalidat di NVAO. Na final di e bishita di evaluashon e panel a indiká ku e estudio aki tin un kombinashon úniko di perspektivanan nashonal i internashonal, preparando asina studiantenan pa por funshoná tantu lokal, regional komo internashonal.
Den nan konklushon NVAO ta konstatá ku e estudio tin un vishon kla di e eksigensianan di un programa internashonal, basá riba puntonan di salida di e “Society for Human Resource Management” (SHRM), e perspektiva di e komunidat di HRM profesional na Kòrsou i e perspektiva di “Landelijk Overleg Orgaan HRM” (LOO-HRM) na Ulanda. Es mas, nan ta konkluí tambe ku e énfasis di e programa ta pa eduká profeshonalnan di HR ku lo kontribuí na desaroyo i ehekushon di business plan i ophetivonan di henter e organisashon kaminda nan ta bai traha.
E pilarnan fuerte di e programa no ta solamente e partinan teorétiko, pero tambe e ophetivonan di práktika den e kuríkulo. Ademas den nan di tres aña, studiantenan di e programa di BHRM mester partisipá na e konferensha internashonal di e “Society for Human Resource Management”, ku tur aña ta tuma lugá na Merka. Na e konferensha e studiantenan ta haña e konosementu i abilidatnan mas resien riba nan tereno profeshonal, nan ta desaroyá mas aleu nan abilidatnan di HRM i alabes nan ta kuminsá traha riba nan netwerk internashonal. Durante nan di kuater aña e studiantenan ta keda eksponé tambe na profeshonalnan di nos region den un workshop basá riba un di e posibel kuater tópikonan ku ta: Talent Management, HR Analytics, Strategic Workforce Planning òf Leadership.
State of the art
Un di e konklushonnan interesante di NVAO ta ku e resultado di estudio determiná ta “state of the art”. Nan ta relevante pa e práktika di HRM i ta kumpli ku e kriteria riba e nivel di bachelor. Un otro konklushon di NVAO bale la pena menshoná ta, ku e vishon i resultadonan di estudio determiná ta riba un liña ku e vishon i prioridatnan di e ambiente profeshonal lokal. E kuríkulo ta riba un liña ku e resultadonan di estudio determiná, ta kubri esakinan i alabes e eksigensianan di kalidat pa alkansá e nivel di bachelor. Ademas NVAO ta agregá ku e programa ta dirigí riba práktika profeshonal. Desaroyo i aplikashon di konosementu, training i abilidatnan profeshonal i un aktitut profesional korekto ta partinan integral di e programa. E orientashon riba investigashon den e programa ta sostené e desaroyo práktiko di e studiante riba un nivel haltu.
Staf, studiantenan i alumni di Fakultat di Siensianan Sosial i Ekonómiko por ta orguyoso di e programa di BHRM aki.
E programa Bachelor HRM ta ofresé studiantenan ku un diploma di havo, vwo òf sbo– nivel 4 e oportunidat pa sigui ku nan estudio full-time riba tereno di Human Resource Management na Universidat di Kòrsou. Si tin sufisiente interes UoC lo kuminsá den futuro ku un estudio HRM part-time. E estudio part-time aki ta pa profeshonalnan ku ya ta trahando riba tereno di HR i ku kier atkeri nan diploma di bachelor, òf kier hisa nan konosementu i abilidatnan na e nivel mas moderno i up-to-date.
Pa informashon detayá tokante e programa di HRM, por tuma kontakto ku Direktor di Programa sra. L. Chong, telefon 744-2155 (durante oranan di ofisina). Tambe por manda un e-mail na l.chong@uoc.cw.
Si bo ta deseá di keda na altura di e desaroyonan mas resien, bo por sigui nos riba Facebook:
https://www.facebook.com/Curacao-HRM-Professional-Association-688709577901656/

Advertisements
error: Content is protected !!
%d bloggers like this: