Advertisements

UoC ta kumpli ku su obligashonnan finansiero

UoC ta kumpli ku su obligashonnan finansiero

Universidat di Kòrsou Dr. Moises da Costa Gomez (UoC) ta kumpli ku su deber di informá komunidat korektamente.

Kontrali na lokual a keda ventilá den prensa lokal dor di direktor di ABC Opleiding & Training, UoC ta informá ku pa áños e ta kumpli debidamente ku su deber di retené i di paga primanan sosial, impuesto i tambe prima di penshun pa tur su empleadonan, bou di kua tambe Rector Magnificus. E insinuashon ku UoC debe miónes na instansianan di gobièrnu tambe ta inkorekto, mirando ku den pasado UoC a drenta areglo di pago ku e instansianan aki i a tene su mes na esaki. Ademas, despues di a sinta den diferente ronda di kombersashon ku gobièrnu UoC a logra ku un gran parti di su debenan di ántes a keda saniá. Tabata trata di primanan bieu di AOV, AVBZ, OV, impuesto di entrada i omzetbelasting.

E kontenido di e rapòrt di BAB alabes e fiansanan di MCB i APC na kua ta keda referí, a keda superá basta tempu kaba mirando ku esakinan no ta aplikabel mas. UoC no tin fiansa serka e instansianan menshoná.

Den pasado UoC a sinta den un komishon di trabou huntu ku Ministerio di Enseñansa, Siensia, Kultura i Deporte plùs Ministerio di Finansa pa buska un solushon struktural pa e retonan finansiero di universidat. E rapòrt ku a resultá di e deliberashonnan aki ya a keda entregá na gobièrnu.

Por último UoC ta informá ku e direktor di ABC Opleiding & Training aparentemente a tuma komo hòbi pa embolbí UoC den su komunikashonnan na prensa. UoC ta un instituto ku ta respetá su mes i ku ta regla su asuntunan na un manera profeshonal i debidamente. Teniendo kuenta ku e gran kantidat di trabou ku tin pa hasi na universidat pa ehekutá su plannan i ambishonnan, UoC ta informá komunidat ku den futuro e no ta bai reakshoná mas riba alegashonnan di e direktor di ABC Opleiding & Training.

 

Advertisements
%d bloggers like this: