Advertisements

Rueda di prensa ku un akto di konfeshon dramátiko di Whiteman

Stephen Walroud (PAR): ta su konsenshi lo ta remordé


Rueda di prensa ku un akto di konfeshon dramátiko di Whiteman

 

Den e rueda di prensa di djaluna último nos por a tende eks promé minister Ben Whiteman konfesá na pueblo di Kòrsou ku danki na un desishon ku e (so) a tuma, pueblo di Kòrsou a hañ’é ku e chinesnan di Guandong Zherong Energy (GZE) ku historia a mustra ku ta un kompania estilo galiña sin pluma. Whiteman den su konfeshon a trese dilanti ku a base di su frustrashon personal pa ku e trato di e Venezolanonan, Hulandesnan i ambientalistanan lokal, su kana a yena i di gòlpi e la disidí su so ku su so i sin deliberá ku niun hende pa bòltu kashaka i hinka henter Kòrsou den un aventura ku e kompania GZE for di China. Defakto Whiteman dilanti di tur kámara di Kòrsou a deklará ku no ta Werner Wiels ta esun kulpabel di e show di engaño ku a wòrdu harmá ku MDPT i GZE, pero t’é ta esun ku a duna òrdu na MDPT pa legumai tur otro posibilidat i drenta ku e Chinesnan di GZE sin hasi screening na drechi.

Inkreibel pero bèrdat pa realisá awe ku a base di e aktuashon deskabeyá, iresponsabel i emoshonal di eks promé minister Whiteman, hinter Kòrsou i sigur esnan dependiente di nos refineria a pèrdè mas ku 15 luna di tempu sumamente balioso. Tempu balioso pèrdí den un akto teatral unda den boka di elekshon na 2016 a presentá GZE komo un kompania estatal Chines ku hopi kapital su tras i ku e kompania aki su invershon lo a bai saka nos for di tur problema. I henter Kòrsou a kai den e wega di manipulashon masal aki.

Ta ken no ta kòrda e bòrchi di propaganda riba sede di Pueblo Soberano ku ta bisa 18.000.000.000 rason pa vota pa Pueblo Soberano? Ta ken no ta kòrda e propaganda na televishon unda e direktor di GZE na idioma Chines ta sigurá nos tur ku GZE tin un kompromiso ku pueblo di Kòrsou i ku nan lo sòru pa redusí tur polushon i duna míles di hende trabou? Ta ken no ta kòrda tur e bishitanan hasí na China dor di diferente grupo inkluso miembronan di sindikato i media? Ta ken no ta kòrda e plannan pa hasta traha un refineria nobo na Bullenbaai i kambia nos refineria bieu den un area estilo di Las vegas? Ken por a kere ku a lo largu i den sekreto ta pueblo mes tabata paga pa tur e propagandanan na radio i televishon? Ken por a kere ku pueblo mes tabata paga tur e biahenan pa China i ku pueblo su sèn a wòrdu gastá den un novela na man di Werner Wiels i ku bendishon di Ben Whiteman.

P’esei no por yega na otro konklushon ku awor Werner Wiels a hañ’é den problema serio dilanti mesa bèrdè unda e tin ku responsabilisá su mes, Ben Whiteman su konsenshi a kuminsá remordé i awe e ta bin basha ‘bou ku ta é ta esun kulpabel pa a duna òrdu di sigui enkaminá e trayekto ku GZE.

Advertisements
error: Content is protected !!
%d bloggers like this: