Advertisements

Reunion Inter Parlamentario Tripartit i IPKO

Reunion Inter Parlamentario Tripartit i IPKO

Durante di reunion Inter Parlamentario IPKO sra. Pauletta tabatin e oportunidat di bishitá ‘Afvalverwerking Rijnmond’.

Pa Kòrsou ta sumamente urgente pa nos kuminsá pensa riba e forma ku nos ta bai kontinuá manehá sushi líkido i no líkido di kas i di negoshi. Aktualmente tur sushi di kas i negoshi (no líkido) ku no por wòrdu resiklá, komo Pais ta tapa nan bou di tera na Landfill Malpais. Esaki ta dañino pa nos medio ambiente i tambe pa salú di nos siudadano. Ademas e espasio na Malpais ya kaba ta saturá di sushi, ku konsekuensia ku pronto mester buska un solushon ku urgensia.

Durante IPKO a tuma nota ku no ta Kòrsou so ta eksperensiando e problema aki. St. Maarten tambe ta biba ku mesun problema. Asina leu ku nan landfill ta pega na kandela ku regularidat, ku konsekuensia serio pa nan medio ambiente i salubridat. Aruba tambe tin e mesun sistema di maneho di sushi ku Kòrsou i nan tambe ta buskando un solushon duradero.

Komo parti di e palabrashon nan di IPKO e delegashonnan, a yega na un akuerdo pa huntu komo Paisnan den Reino nos wak ta kua por ta solushonnan struktural i duradero ku nos por bini kuné pa e problemátika aki. Den kuadro di esaki kada gobièrnu lo mester evaluá e maneho di sushi i tambe e disponibilidat pa traha en konhunto serka e gobièrnunan di Reino.

Tur 4 delegashon ta konsiente ku prevenshon ta sumamente nesesario. Esta kon nos ta konsientisá e siudadano pa atendé ku su sushi di kas i di su kompania di un forma responsabel i kuminsá hasi uso di materialnan biológiko, natural i sigur pa nos medio ambiente. Parti importante di esaki ta resiklá mas tantu ku ta posibel.

Komo frakshon di PAR nos lo bai pone atenshon di aserka riba e palabrashonnan aki. Dia 5 di yüni nos a selebrá dia Internashonal di Medio Ambiente i ta nesesario pa nos komprometé na kuida i protehé nos medio ambiente i naturalesa.

Ana -Maria Pauletta

Lider di Frakshon

Advertisements
error: Content is protected !!
%d bloggers like this: