Advertisements
window.dataLayer = window.dataLayer || []; function gtag(){dataLayer.push(arguments);} gtag('js', new Date()); gtag('config', 'UA-83616463-1');

Minister Gijsbertha ta deklará ku défisit den (ZV Fonds fondo di malesa) ta debí na komersiantenan ku ta manda empleadonan pa mèldu AO riba e di 3 dia pa asina e komersiantenan por “verhaal” manda kobra SVB

Minister Gijsbertha ta deklará ku défisit den
(ZV Fonds fondo di malesa) ta debí na komersiantenan ku ta manda empleadonan pa mèldu AO riba e di 3 dia pa asina e komersiantenan por “verhaal” manda kobra SVB

Kòrsou, 5 di yüni 2018

Den reunion públiko di djamars último Minister Kenneth Gijsbertha den presensia di Promé Minister Rhuggenaath a anunsia, a lòs un bòm den sala di Parlamento di Kòrsou divulgando den Parlamento ku Gobièrnu ta trahando riba un proposishon pa kambia e “Carensdagen” di 3 pa 10 dia. “Carensdagen” ta e dianan ku un persona por ta malu sin ku e tin ku bai SVB pa kontrol. Ku e kambio aki ta bai tin mas impakto negativo den nos ekonomia, paso lokual Gobièrnu realmente ke hasi ta schuif e responsabilidat di pago riba komersio. Tin un défisit di 133 mion na 2017 i den 2018 definitivamente tambe ta bai tin, pero tur kos ta falta di otro hende.

Den praktiká esaki ta nifiká ku na momentu ku un trahadó ta malu, e por keda dos dia kas i su doño di trabou ta esun ku tin ku paga e trahadó e dos dianan aki. Na momentu ku e tin tres dia òf mas konsekutivo malu e mester mèldu na SVB i for di e momento ei e gastunan di e suèldu di e trahadó ku ta malu ta wòrdu paga dor di SVB cq. Gobièrnu.

Minister Gijsbertha a splika ku e motibu pa trese kambio den e lei aki ta debí ku sierto komersiantenan ta hasi mal uso di e lei aki. Segun Minister Gijsbertha na momentu ku e trahadó no ta malu mas despues di dos dia, e komersiante ta indiká na e trahadó pa e keda un dia mas kas komo si fuera e ta malu pa e komersiante por hasi apelashon riba e suèldu ku SVB mester kubri “loonderving”.

E forma di pensa i manera di ekspresá aki kontra di komersiantenan di parti di Gabinete Rhuggenaath representá durante di e reunion den Parlamento pa Minister di Finansa Kenneth Gijsbertha i Promé Minister Rhuggenaath a sorprendé frakshon di MFK.

Esaki debí ku segun Gabinete Rhuggenaath, algun komersiante ta hasi mal uso di e lei ariba menshoná nan ta pasa over pa hasi un adaptashon na e lei pa kastigá tur komersiante dor di subi e dianan ku un trahadó mester mèldu na SVB te na 10 dia. Na momentu ku e medida aki wòrdu apliká pueblo di Kòrsou por spera un oumento di kosto di bida i esaki lo bira mas haltu di loke e ta kaba.

E medida aki lo tin komo konsekuensia un subida drástiko di gastu pa e komersiante, e konsekuensia lógiko ta bai ta ku e komersiante lo kalkulá e oumento di gastu aki den preis di su servisio i/òf produkto na e konsumidó. E medida aki lo kontribuí pa baha produktividat, dor ku lo no tin un kontròl rígido di parti di SVB ku si di bèrdat e persona ta malu si òf nò, debí ku e trahadó lo por keda kas malu 10 dia, promé ku e presentá na SVB pa kontrol.

Frakshon di MFK ta drenta reunionnan ku temanan finansiero sperando ku riba nos preguntanan nos por haña kontestanan ku por duna pueblo di Kòrsou un aliento i speransa pero kada bes di nobo nos ta wòrdu sorprendé ku e tipo di medidanan aki.

No mas ku siman pasa un miembro di Parlamento ku ta sostené koalishon a deklará ku Gobiernu di Kòrsou defakto ta bankarota. Awe durante di e reunion riba e punto aki Minister Kenneth Gijsbertha ta kontradesí su mes bisando ku gobiernu no ta bankarota debí ku nan ta pagando resibunan/debenan i despues e ta informá Parlamento ku ta bai refinansiá fiansanan ku ta kaduká na 2020 pa gobiernu por tin espasio finansiero i tambe ku ta bai fia mas sèn riba merkado di kapital, awor si bo no ta bankarota i bo ta pagando bo resibunan/debenan ta dikon mester refinansiá debenan i bai fia sèn?.

E praktiká ariba menshoná ta e forma ku tabata sosodé den tempu di Antia Hulandes, awor e praktiká aki ta bin bek bou di Gabinete Rhuggenaath den persona di Ministernan Gijsbertha i Rhuggenaath, no keda sorprendé ku na final di e periodo di gobernashon aktual e debe nashonal, ekonomia i kosto di bida a bai di “Guatemala pa Guatepeor”.

Ku e Gobièrno aki e resultadonan ya ta di pensamentu di famianan ku realementa ta planeando pa bandona Kòrsou, Gabinete Rhuggenaath ta bai kousa un exodo meskos ku a sosode na añanan 2000 despues di medidanan di IMF tuma dor di Gabinete di PAR.

Na nòmber di frakshon di MFK,

Gerrit F. Schotte
Parlamentario i
lider di Frakshon di MFK

Advertisements
error: Content is protected !!
%d bloggers like this: