Advertisements

Tema Dia Mundial di Medio Ambiente 2018 Ban Kombatí Polushon di Plèstik 

Tema Dia Mundial di Medio Ambiente 2018


Ban Kombatí Polushon di Plèstik      



Willemstad – Nashonnan Uní a proklamá un dia Internashonal di medio ambiente na okashon di apertura di e konferensha tokante “Human Environment” na Stockholm na aña 1972. For di e tempu ei mundu ta selebrá Dia Mundial di Medio Ambiente riba 5 di yüni. Ku esaki Nashonnan Uní ke generá atenshon mundial p’e problemátika di medio ambiente i enkurashá konsientisashon riba nivel mundial  i akshoná ku e meta pa protehá nos medio ambiente. E tema di e aña aki ta un tema ku entre tantu pa nos aki na Kòrsou tambe ta bastante konosí; Ban Kombatí Polushon di Plèstik..

Plèstik ta dañino pa medio ambiente i ta kousa di morto di miónes di animal den laman i riba tera. Islanan grandi di plèstik i foam ku ta akumulá den laman ta drif sin destino den oséano. Tin sierto tipo di plèstik ta dura mas ku mil aña promé e disolvé i kaba na nada. Mundialmente un total di 8 mion ton di plèstik ta yega laman pa aña. Produkshon di plèstik tambe ta kousa daño na medio ambiente dor di e CO2 ku ta keda emití kual ta kousa daño na nos atmósfera. Tumando na kuenta tur e karakterístikanan dañino aki hopi pais na mundu a kuminsá tuma medida pa redusí uzo di plèstik i Kòrsou no ta eksepshon.

Ministerio di GMN tambe ta sostené e akshon mundial pa kombatí polushon di plèstik na Kòrsou. Den e kuadro aki Minister di GMN a sostené na aprel último un proposishon di Parlamentu pa trese kambio den Warenwet ku e meta pa prohibí uso di tasnan di plèstik di un solo uzo, bekernan di plèstik i richi. Ademas e kambio di lei lo enserá prohibishon pa uso di bakinan di foam i otro materialnan di plèstik i foam.

Den e kuadro aki Ministerio di GMN a forma un aliansa ku Curaçao Clean Coalition (CCC) pa organisá akshonnan di “Plastic Attack” pa konsientisá pueblo riba uso di plèstik. E promé “Plastic Attack” na Kòrsou i den Caribe a tuma lugá dia 20 mei último ku koperashon di Centrum Supermarket Piscadera. Bastante persona a akudí pa sostené e akshon. Ministerio lo keda sostené e akshonnan di “Plastic Attack” pa e añanan benidero kual sigur lo duna un aporte na konsientisashon di komunidat. Ademas Ministerio di GMN lo bin ku mas akshon pa konsientisá pueblo riba uso di plèstik i su impakto riba medio ambiente i naturalesa.

Riba potrèt por mira un isla bastante grandi di entre otro plèstik, foam i palu ku ta drif den laman.

Riba potrèt por mira e daño ku plèstik ta hasi na paranan akuatiko.

Riba potrèt por mira garoshinan den kua a kolektá plèstik durante e akshon “Plastic Attack” ku a tuma lugá dia 2 di mei último na Centrum Supermarket..

Advertisements
error: Content is protected !!
%d bloggers like this: