Advertisements

Reunion Inter Parlamentario Tripartit i IPKO

Reunion Inter Parlamentario Tripartit i IPKO

 

Na nòmber di Parlamento di Kòrsou i komo parti di e delegashon, durante e siman di 28 di mei pa 1 di yüni, Parlamentario señora Ana Maria Pauletta a partisipá na e reunion di tripartit entre Kòrsou, Aruba i St. Maarten,  i tambe e reunionnan di IPKO entre Kòrsou, Aruba, Hulanda i  St. Maarten,

Durante un serie di 3  komunikado lo e duna un relato di e reunionnan kuminsando na:

  1. Tripartit
  2. Interparlementair Koninkrijk Overleg (IPKO)
  3. Palabrashon i Kontinuashon

Na e tripartit ta partisipá e delegashon di Kòrsou, Aruba i St. Maarten. Simannan promé  ku e reunion hefe di delegashon señor Millerson i presidente di e komishon señora Pauletta ta fiha un agènda huntu ku otro hefe i presidente di e komishonnan.

Pa e tripartit aki Kòrsou entre otro a pone algun punto ku pa nos ta sumamente importante riba e agènda entre otro:

  1. E situashon di migrante nan di Venezuela;
  2. Trabou konhunto riba tereno di Salubridat i enseñansa;
  3. Reunion Tripartit huntu ku Sürnam;
  4. Parlamento Hubenil pa Kòrsou, Aruba i St. Maarten

Pa loke ta trata e situashon di migrante nan di Venezuela, por tuma nota ku pais ruman Aruba ta eksperensiá mesun situashon. Tur dos pais ta ripará un oumento alarmante den e subida di migrashon iregular di migrante for di Venezuela ku konsekuensia di un subida di e kantidat di persona sin dokumento riba nos paisnan.

Durante e reunionnan di tripartit por a tuma nota ku St. Maarten no ta eksperensia e mesun impakto di migrashon for di Venezuela den nan pais. E delegashon di St. Maarten a demostrá nan kombibensia i sosten pa Kòrsou i Aruba. Riba e punto aki a palabra pa kompartí mas informashon entre paisnan i traha mas serka ku otro riba tereno di legislashon i kontrol.

Tur 3 pais, esta Kòrsou,  Aruba i St. Maarten ta de akuerdo ku nos lo bai tin ku traha huntu pa yega na solushonnan konhunto pa dilemanan komun. Asina mes nos por tuma nota ku riba tereno di salubridat tin hopi trabou huntu ku ta wòrdu hasi entre Kòrsou, Aruba i Boneiru (Hulanda). Minister di enseñansa sra. Alcala Walle ta trahando riba un konferensia grandi pa loke ta trata e trabou konhunto den Reino  riba e tereno di edukashon.

Un palabrashon ku  a yega na dje durante di e tripartit ta pa tene mas reunion via di ‘videconference’, pa asina keda na altura di loke nos paisnan ruman ta hasi i punto nan di atenshon di kada pais. Tambe riba petishon di Sürnam a palabra pa kuminsá bek ku reunion tripartit ku Sürnam. Asina aki tiki tiki Kòrsou su Parlamento ta abarká e teritorio di Karibe.

Ta importante pa nos keda Partisipá na e reunionnan aki, pa asina nos por saka e máksimo bentaha pa nos pais. Den e segundo komunikado di prensa lo señora Pauletta lo duna un relato di e reunion di IPKO I tambe e kontinuashon despues di e reunion di Tripartit i IPKO.

 

Ana -Maria Pauletta

Lider di Frakshon

Advertisements
%d bloggers like this: