Advertisements

Reunion di e Komité di e Sentro di Aktividat Regional ku ta duna training riba polushon di laman Karibe aki na Kòrsou

Reunion di e Komité di e Sentro di Aktividat Regional ku ta duna training riba polushon di laman Karibe aki na Kòrsou

 

Willemstad – Dianan 5, 6 i 7 di yüni próksimo ta tuma lugá aki na Kòrsou e di nuebe reunion di Komité di e Sentro di Aktividat Regional ku ta duna training riba polushon di laman den Karibe, RAC/REMPEITC-Caribe. Representantenan di diferente organisashon no gubernamental lokal i internashonal ta topa otro na Renaissance durante e dianan menshoná.

RAC/REMPEITC ku ta para pa Regional Activity Centre / Regional Marine Pollution Emergency, lnformation and Training Centre ta un di e kuater Sentronan di Medioambiente di Nashonnan Uni (UNEP). Na 1995 Gobièrnu di Kòrsou a instituí e sentro aki na Kòrsou ku ta konsistí di ekspertonan asigná pa medio di Cartagena Convention di 1983.

Aktividatnan di e sentro ta supsidiá pa e Organisashon Marítimo Internashonal (IMO), UNEP i e Programa di Desaroyo di Nashonnan Uní (UNDP) i Gobièrnu di Kòrsou. Su meta ta pa asistí i konsehá paisnan den Karibe riba prevenshon i redukshon di polushon den laman dor di desaroyá i evaluá plannan di kontingensia nashonal i multilateral, organisá training i tayer, duna sosten tékniko i konsulta i tambe informá i konsientisá públiko.

E meta prinsipal di e seshonnan ta ekstenso. Ta bai aprobá aktividat i desaroyo di añanan 2016 i 2017 den e área di polushon den laman i tambe aprobá e plan di 2018 – 2020 di RAC/REMPEITC-Caribe. E plan stratégiko di término largu di e sentro ta bai haña un revishon mas aktualisá pa 2019-2025. Ademas a krea tempu pa kada organisashon presente kultivá e koperashon ku otro i sosten pa huntu sirbi e region di Karibe mas mihó.

E organisashon RAC/REMPEITC Caribe tin mas ku 22 aña na Kòrsou i ta resortá direktamente bou di Minister di Tráfiko, Transporte i Planifikashon Urbano. E ta ubiká na Edifisio Siegfried Fransisco na Seru Mahuma. Pronto e sentro ta ekspandé ku dos eksperto, unu di Jamaica i unu di Industria Petrolero huntu ku un eksperto di US Coast Guard. Pa mas informashon tokante e sentro por bai na www.racrempeitc.org.

Advertisements
%d bloggers like this: