Advertisements
window.dataLayer = window.dataLayer || []; function gtag(){dataLayer.push(arguments);} gtag('js', new Date()); gtag('config', 'UA-83616463-1');

Pueblo a laga su bos resoná riba futuro di Sha Caprileskade

Pueblo a laga su bos resoná riba futuro di Sha Caprileskade

 

WILLEMSTAD-  Minister di Desaroyo Ekonómiko, sr. Steven Martina, huntu ku Ministerio di Desaroyo Ekonómiko (MEO) i UNDP kier gradisí pueblo di Kòrsou pa un Diálogo Demokrátiko sumamente eksitoso. Djaweps dia 31 di Mei a tene e Diálogo Demokrátiko riba Futuro di Sha Caprileskade i pueblo su aporte den e manera kon esaki a transkurí i den e resultadonan ta berdaderamente di aploudí.

 

E proseso di e Diálogo Demokrátiko den su totalidat a wòrdu guia i kanalisá dor di representantenan lokal di United Nations Development Program (UNDP).

Inisialmente e enfoke tabata pa dialogá ku un total di 80 partisipante for di diferente gruponan di interes den nos komunidat. Sinembargo, despues ku inskripshon a sera, MEO a konstatá ku e interes tabata sumamente haltu i pues a laga e oportunidat habrí pa mas persona por a bin dialogá tokante nan vishon riba futuro di e waf na Sha Capriles.

Promé ku e diálogo a kuminsá, e partisipantenan a risibí entre otro informashon riba parti di e historia i e balor kultural ku e waf ta karga, a pasa dor di e desishon ku Konseho di Minister a tuma dia 7 di mart di e aña aki riba futuro a korto plaso i a largo plaso pa ku Sha Capriles i a splika e partisipantenan dikon a skohe pa un Diálogo Demokrátiko i kiko lo ta nan ròl den esaki.

E partisipantenan a dialogá den gruponan di 6 a 8 persona huntu ku un fasilitadó di UNDP i a base di esaki a entregá nan sugerensianan riba e futuro di e waf. Na final di e anochi a pone sugerensianan di tur e diferente gruponan huntu i tur partisipante por a depositá nan voto riba e sugerensia ku e ta haña mas faktibel. E 10 sugerensianan ku a risibí mas voto a bolbe pasa den un di dos ronda di votashon pa a konkluí ku un tòp 3.

E vishon ku a risibí mas voto na final di e anochi, tabata pa re-aloká e fasilidatnan di parker na e parti di “waterfront” i desaroyá e área aki ku teras i lokalidatnan di horeca i bibienda. Den e sugerensia aki e barkunan di fruta lo sigui funshoná komo tal durante dia i anochi aktividatnan di horeca lo kontinua na e otro banda di kaya.
E di dos sugerensia tabata pa mantené nos historia i laga e barkunan venezolano so sigui hasi uso di e waf na Sha Capriles. Den e sugerensia aki partisipantenan a suprayá si, ku ta importante pa drecha e parti di higiena, strukturá e uso di e waf mas mihó i laga e usuarionan paga pa uso di e infrastruktura.
E di tres vishon mas votá tambe tabata sugirí pa e barkunan di fruta keda na Sha Caprileskade. Esaki, mirando ku e barkunan ta un atrakshon turístiko di hopi tempu i ku operadornan turístiko ta bende e paisahe aki komo tal. Loke si e partisipantenan a indiká ta, ku mester reglamentá e merkado di forma mas strukturá. Partisipantenan a pidi pa no meskla e merkado flotante ku merkado di Kòrsou. Nan ta di opinion ku Marshe nobo ta e lugá mas indiká pa e yu di tera bende su produkto.

Mirando e importansia di e waf aki pa nos pueblo ya pa diferente generashon, Minister di Desaroyo Ekonómiko i MEO a haña importante pa a skucha pueblo su vishon den esaki i pueblo su bos tabata bon kla pa medio di e votonan depositá. Tantu Minister Martina komo MEO ta gradisí pueblo di Kòrsou inmensamente. Ku e tòp 3 ku a keda skohé pa medio di e diálogo aki Minister Martina, huntu ku Gobièrnu di Kòrsou,  awor tin un direkshon pa kana yega na un desishon konkreto, struktural i duradero pa ku e futuro di Sha Caprileskade

Advertisements
error: Content is protected !!
%d bloggers like this: