Advertisements
window.dataLayer = window.dataLayer || []; function gtag(){dataLayer.push(arguments);} gtag('js', new Date()); gtag('config', 'UA-83616463-1');

Eksitoso seshon di informashon pa empleado públiko pa temporada di orkan 2018

Eksitoso seshon di informashon pa empleado públiko pa temporada di orkan 2018

 

Willemstad – Alrededor di 300 empleado públiko a haña splikashon ekstensivo durante dos seshon di informashon tokante preparashonnan pa temporada di orkan, ku ta di 1 di yüni te ku 30 di novèmber. Den e periodo akí e chèns ta mas grandi ku Kòrsou por hañ’e ku molèster i situashonnan di alerta pa mal tempu. Ta trata di informashon pa hende por yuda nan mes mas tantu posibel durante di un kalamidat, sin tin ku pidi yudansa kada biaha di outoridatnan, mientras e outoridat tin ku duna asistensia na otronan ku tin mas mester di yudansa. Direktorado di maneho i kontrol di Riesgo i Kalamidat huntu ku e Organisashon pa Kombatimentu di Kalamidat di Kòrsou, riba dia 31 di mei último a organisá un seshon di informashon tokante preparashon di  temporada pa orkan speshal pa empleado públiko.

Minister di Asuntu General, sr.Eugene Rhuggenaath, den su funshon di ‘opperbevelhebber’ durante un kalamidat, a enfoká durante di e seshon di informashon, riba e nesesidat di prepará na tempu pa un orkan. Minister tambe a para ketu na e bon trabou i yudansa ku e empleadonan públiko di Kòrsou a duna St. Maarten promé, durante i despues di orkan Irma. Diferente oradó a splika tokante e aspektonan pa tene kuenta kune. Lesley Fer, kordinadó nashonal di desaster, a trata e tópiko di un plan di kalamidat i e pakete di emergensia, ku entre otro kuminda den bleki, awa, radio ku ta traha riba bateria, flèshlait i remedi na stòk.

Albert Martis, direktor di Servisio Meteorológiko, a para ketu na kiko temporada di orkan binidero por trese i e diferente fasenan di alerta. Bosero di Kuerpo Polisial, Alfred Suares, a enfoká riba importansia pa sigui órden di polis durante un kalamidat pa seguridat di tur hende. Sr. Keli, kordinadó nashonal di desaster médiko, a para ketu na e importansia di higiéna durante di un orkan i akseso na un kit di E.H.B.O pa promé ousilio. Numbernan di dòkternan i informashon médiko, semper mester ta aksesibel den un kaso di emergensia.

Dikmar Oleana, officier di brantwer enkargá ku e departamento di prevenshon, a enfoká riba seguridat na kas i rondó di kas. Esaki ta enserá kontrolá i limpia e sistema di fluho di awa rònt di kas, kita rama di palu ku por forma peliger òf molèster i tuma otro paso pa protehá kas i hende durante di orkan i despues. Elvin Regina, komandante di Brantwer i Lider Operashonal durante desaster, a papia di e importansia pa por salbaguardiá bo mes, famia i biennan promé, durante i despues di un orkan. E aspekto di prepará bo mes ta di sumo importansia.

Durante di e aña aki ta bin mas informashon tokante preparashonnan pa orkan, no solamente pa empleado públiko, pero tambe pa sobrá di komunidat. Pa loke ta trata e seshonnan pa empleado públiko por papia di un eksito. Kuater empleado públiko a gana pa medio di un  rifa un pakete di emergensia den un hèmber, patrosiná dor di un konosido hartwèr na Kòrsou. Mas informashon tokante orkan i otro desaster ta riba e app Kalamidat, website Kalamidat, website di Meteo Kòrsou i riba website i facebook di Gobièrnu di Kòrsou. Ora bo sa, bo ta prepará!

Advertisements
error: Content is protected !!
%d bloggers like this: