Advertisements

Pa dia mundial di Medioambiente Selikor ta pidi si bo no por reus’é no tum’é

Pa dia mundial di Medioambiente Selikor ta pidi si bo no por reus’é no tum’é

 

5 di yüni, dia mundial di Medioambiente, Selikor meskos ku hopi otro organisashon rònt mundu ta para ketu na e dia akí. Tema di e aña akí ta: ‘Kombatí polushon di plèstik’. Netamente eskoho di e tema akí a pone ku Selikor a disidí pa, durante henter e siman ku ta presidí e fecha memorabel, motivá komunidat pa tuma akshon i redusí uso di plèstik desechabel. Tambe lo mustra komunidat riba alternativanan. Lema di e siman di konsientisashon, motivashon i akshon ta: ‘Si bo no por reus’é no tum’é’.

Nashonnan Uní a proklamá dia mundial di Medioambiente na 1972 i for di 1974 ta selebrá esaki riba 5 di yüni. Meta prinsipal di e dia akí ta pa krea konsientisashon i stimulá akshon individual riba diferente tema relatá na medioambiente. Akshonnan individual mester kontribuí na krea un plataforma kolektivo pa realisá un medioambiente mas duradero i garantisá un futuro próspero i sigur pa tur nashon i ser humano. Tur aña di nobo Nashonnan Uní ta skohe un tema pa e dia i miónes di hende di mas ku 100 pais rònt mundu ta partisipá di un forma òf otro na e dia di mediambiente. E desaroyo alarmante den polushon di plèstik mundialmente i e konsekuensianan devastador ku esaki ta trese kuné a pone ku pa 2018 a skohe e tema akí.

Segun Nashonnan Uní kontaminashon di plèstik ta un di e problemanan ambiental mas grandi di nos époka: statistiknan ta mustra ku na 2050 lo tin mas plèstik ku piská den nos oséanonan. Plèstik desechabel a para bira un parti di nos bida diario te ku nos no ta para ketu mas i realisá kuantu plèstik desechabel nos mes ta usa. Djis pensa un ratu riba: bòter di bebida, kùp, pipa, saku di supermerkado, kuchú i fòrki di plèstik. Sigur debí na gastunan abou, uso práktiko i e hecho ku ta trata di artíkulonan liviano Nashonnan Uní ta konstatá un revolushon den e sektor di empake pa loke ta trata uso di plèstik.

Aki na Kòrsou tambe nos por konstatá un oumento den e polushon di plèstik okashoná prinsipalmente pa sakunan di kompra desechabel. Uso di saku di plèstik desechabel a bolbe lanta kabes despues ku na aña 2008 Selikor huntu ku e asosashon di supermerkadonan, SUVECO, a lansa kampañanan di konsientisashon eksitoso pa stimulá uso di tas di kompra reusabel. E posibel bentahanan i gastu abou di e sakunan akí di ningun manera por kompensá pa e daño katastrofal ku e sakunan akí tin pa nos medioambiente.

Pa logra kambio den e desaroyo alarmante akí nos tur mester duna nos aporte. Den e kuadro akí Selikor kier stimulá tur organisashon edukativo, gubernamental i privá i komunidat den su totalidat pa kontribuí na e dia akí ku un akshon spesífiko dirigí na kombatí polushon di plèstik. Pa ideanan kon duna kontenido na e dia akí subi www.worldenvironmentday.global. Tambe Selikor ta rekordá ku na kaya di medioambiente na Malpais bo por entregá bo plèstik di forma separá. Na e kompleho di lèntfel ta prepará e plèstik di forma ku por bende esaki komo materia prima.

Hopi akshon individual huntu ta krea un impulso kolektivo ku lo duna fruta duradero pa medioambiente di nos pais i di nos planeta. Analisá kuantu produkto di plèstik desechabel bo ta usa diariamente i remplasá nan ku un opshon duradero. Si bo no por reus’é no tum’é…….pasó t’asina ta hende.

 

Advertisements
error: Content is protected !!
%d bloggers like this: