Advertisements

TRABOUNAN PA YEGA NA PARTNER STRATEGIKO PA NOS REFINERIA TA PROGRESANDO NO OPSTANTE RETONAN KU TA PRESENTANDO NAN MES.

TRABOUNAN PA YEGA NA PARTNER STRATEGIKO PA NOS REFINERIA TA PROGRESANDO NO OPSTANTE RETONAN KU TA PRESENTANDO NAN MES.

Willemstad 15 di Mei 2018- E trabounan pa yega na un partner stratégiko pa manehá i operá nos refineria despues di desember 2019 ta kanando bon riba skema. Durante di e último luna basta trabou a keda realisá. A finalisá e proseso pa buska un eksperto kapabel den materia pa asistí Refineria di Kòrsou (RdK) den e buskeda pa un partner stratégiko. IHS Markit a keda skohe basa riba nan konosementu i eksperensha amplio ku e materia.
IHS Markit a yega di realisؘá trabou na Kòrsou kaba den pasado. Entre tantu trabounan ya a kuminsá i tur kos ta indika ku entre yüli i ougùstùs lo ta kla pa por manda e asina yama “High quality investor’s data package”pa potenshal intersandonan.
Konforme desishon di akshonista a integrá e trabounan di e buskeda pa un partner stratégiko den Refineria di Kòrsou (RdK). E trabounan ta keda realisá pa Program Management Organisation (PMO) ku mester operá konforme e struktura i regla empresarial di Refineria di Korsou. RdK miéntras tantu ta hasiendo esfuerso pa CRU funshoná optimal pa mas tarda yuni pròksimo i ta vigilando i atendiendo ku e riesgonan asosiá ku e realidat di PDVSA.

Preparando “High quality investor’s data package”
Despues ku a skohe IHS Markit komo eksperto pa asisti Kòrsou den e buskeda di un partner stratégiko pa manehá i opera nos refineria, den un destaho transparente na kua 7 di e 15 kompanianan ku a keda aserká a entrega un oferta, a kuminsa direktamente ku e trabounan pa kompilá un asina yama “High quality investor’s data package”. Esaki ta un dokumentu ekstenso ku aparte di ta duna un bista amplio di e aspektonan tékniko i finansiero di nos refineria, mester kontené tambe p.e. e potensial di nos refineria unabes ku renob’é. Na mes momentu ta sondiá tambe e interes serka interesadonan potensial den mundu. E “High quality investor’s data package” mester ta kla pa mas tardá entre yuli i ougùstùs 2018. Tur esfuerso ta dirigí pa logra ku pa mas tardá fin di aña nos por tin e kandidatonan ku lo sigui negoshá kuné pa yega na un akuerdo definitivo.

Program Management Organization den RdK lantá
Akshonista di RdK dia 28 di Mart ultimo a disidi pa terminá trabou di e MDPT i ubiká tur tarea di buskeda di un partner stratégiko pa nos refineria despues di 2019 den RdK. Entretantu a lanta Program Management Organization (PMO) den Refineria di Kòrsou ku ta realisa e trayekto enkuestion.
PMO, komo parti di RdK, ta funshoná sigun reglanan di bon maneho di RdK. E PMO ta fisikamente den e edifisio kaminda RdK tin su ofisina afin ku ta logra mas efisiensha i redusí gastunan mas tantu ku ta posibel.
E trabounan ku mester keda realisá, esta loke MDPT tabata hasi pero tambe tareanan nobo den kuandro di buskeda pa un partner stratégiko, a keda pone den un asina yama “road map” ku tambe a keda aprobá pa akshonista. E profeshonalnan ku ta laborá den e PMO ta apunta abase di e ekspertisio i konosmentu ku tin mester di dje pa logra realisá akshonnan pone den e “road map.”

Ku atenshon pa posibel “early step in” i “emergency.”
RdK, unabes konfronta ku e realidat di PDVSA, a bin ta traha aun mas intensivo riba e senarionan di “early step in” i “emergency.” Rdk ta keda asisti den esaki tambe dor di IHS Markit. Un situashon asina por ta un eventualidat dado kaso ku PDVSA no ta den e kapasidat di manehá i opera e refineria te na fin di 2019. Ta berdat ku na e momentu aki RdK ta papiando ku kompanianan ku a mustra interes pa dado kaso e situashon presenta nan por drenta tuma maneho i operashon di nos refineria. E trayekto aki meskos ku esun pa largo durashon mester keda hasi ku tur deligensha nesesario pa Kòrsou i su refineria ta mihó sirbi.

CRU ta optimal na yuni
E planta di utilidat i stom CRU ta di vital importansha pa operashon di nos refineria. Ta un bèrdat ku e planta di CRU a bin ta konfrontá problema i ku esaki por ta tin reperkushon riba e posiblidat di Refineria Isla pa produsí. Durante di e último lunanan RdK a bin ta realisá trabounan intensivo pa optimalisá e operashon di CRU. E perspektiva ta ku pa yüni próksimo CRU lo ta operando sin difikultat atrobe. Di e forma aki Refineria Isla por operá optimal i lo por produsí atrobe lo maksimo di su kapasidat.

Riba potrèt:
Pic 1. Tim di RdK huntu ku ehekutivonan di IHS Markit;
Pic 2 i 3 Tim di RdK i ehekutivonan di IHS Markit trahando.



Advertisements

Skibi bo komentario / Opinion

This site uses Akismet to reduce spam. Learn how your comment data is processed.

%d bloggers like this: