Advertisements

SIGE ta kontinuá ku Siklo Aminta Sprockel “Stimulashon Trempan den Bario” na Bandabou

Despues di tremendo akogida dos bes aña pasá:
SIGE ta kontinuá ku Siklo Aminta Sprockel “Stimulashon Trempan den Bario” na Bandabou

Willemstad – Fundashon Sentro pa Inovashon i Guia Edukashonal (SIGE) den koperashon ku Plataforma Bandabou ta partisipá ku na luna di mei i yüni lo inisiá Siklo Aminta Sprockel “Stimulashon Trempan den Bario”. E biaha aki e siklo lo tuma lugá den area di Bandabou. Aña pasá na luna di òktober SIGE a introdusí Siklo Aminta Sprockel “Stimulashon Trempan den Bario” na pueblo di Kòrsou i e tabata un éksito rotundo. E enfoke di e siklo di informashon ta speshalmente riba desaroyo i edukashon di mucha di 0 pa 4 aña i ta dirigí speshalmente riba mayor i edukadónan ku ta forma parti di nos komunidat. E tópikonan ku e siklo ta trata ta básiko pero sumamente importante. Algun ehèmpel ta Importansia di Stimulashon Trempan, Importansia di Idioma i Abla, Fasenan di Desaroyo di mucha di 0 pa 4 aña, i Desaroyo di Wega i Material Edukativo. Tur interesado ku kier partisipá mester inskribí na tempu; tene na kuenta ku lugánan ta limitá. Na final di e siklo tur partisipante lo risibí un sertifikado di rekonosimentu serka SIGE.

E departamentu Edukashon Preskolar di SIGE tin e meta prinsipal di kontribuí na desaroyo positivo di tur mucha, na un edat mas trempan posibel, di akuerdo ku nan potensial. Tin atenshon general pa tur mucha, pero tin tambe atenshon speshal pa muchanan ku enkontrá un òf otro tipo di retraso den nan desaroyo. Den kuadro di esakinan e departamentu Edukashon Preskolar ta ofresé sosten i guia kontinuamente na mayornan i edukadónan, ya ku nan ta konvensí ku speshalmente e mayor tin un ròl primordial den desaroyo diario di su yu.

Siklo di informashon Aminta Sprockel
E siklo di informashon ta karga nòmber di e fundadó di e sekshon Stimulashon Trempan, kende ta sra. Aminta Sprockel. Pa por partisipá na e siklo di informashon mester registrá i paga un kontribushon chikí na balor di 5 florin. Lo tene e mesun siklo di informashon dos bia den dos diferente area na Bandabou, unu na Soto i unu naTera Kòrá.  Den ambos kaso tin un ‘deadline’ pa inskripshon ku mester tene kuenta kuné.
Promé tanda:
Fechanan: 5, 12, 19 i 26 di mei
Lugá: Sentro di Bario Soto, Soto z/n
Orario: 14:00 or pa 16:30 or
Por registrá pa e siklo aki te ku: djaweps 26 di aprel 2018
Kontribushon: Fl. 5,-

Di dos tanda:
Fechanan: 2, 9, 16 i 23 di yüni
Lugá: Sentro di Bario Tera Kòrá, Tera Kòrá z/n
Orario: 14:00 or pa 16:30 or
Por registrá pa e siklo aki te ku: djaweps 24 di mei 2018
Kontribushon: Fl. 5,-

Sentro pa Inovashon i Guia Edukashonal (SIGE)
E nòmber SIGE ta enserá e koperashon entre fundashonnan ‘Sentro pa Guia Edukashonal (SGE)’ i ‘Fundashon pa Inovashon di Enseñansa (FIdE)’. Huntu nan tin komo meta e preparashon, desaroyo i implementashon di e maneho pa ku inovashon i mehorashon di e nivel di enseñansa i edukashon di Pais Kòrsou. Den kuadro di e maneho aki, SIGE ta duna sosten na tur aktor den e vèlt di enseñansa i edukashon pa por alkansá optimalisashon i inovashon. SIGE ta kumpli ku e tarea aki dor di konsehá, guia, sostené i duna treinen pa ku asuntunan pedagógiko, didáktiko i di estudio.

Pa registrá i paga kontribushon por pasa libremente na SIGE, na Groot Davelaar 22-23, di djaluna pa djabièrnè, entre 8:00 or pa 12:00 or i 14:00 or pa 17:00 or. Por tuma kontakto ku SIGE na numbernan di telefòn 747-2700 i 738-6570.
Personanan ku ta biba na Bandabou por registrá tambe na Plataforma Bandabou na Kaya Beatrix Bea Muzo 51 Dokterstuin di djaluna pa djabièrnè entre 8:00 or i 16:00 or. Por tuma kontakto ku Plataforma Bandabou na 888-0416.

Advertisements

Skibi bo komentario / Opinion

%d bloggers like this: