Advertisements

Djamars 17 di aprel 2018 e temporada di Prueba Final di Enseñansa di Fundeshi 2018 ta kuminsá pa 1951 (2017: 1977) alumno na Kòrsou.

Temporada di Prueba Final di Enseñansa di Fundeshi 2018 a yega

 

WILLEMSTAD – Djamars 17 di aprel 2018 e temporada di Prueba Final di Enseñansa di Fundeshi 2018 ta kuminsá pa 1951 (2017: 1977) alumno na Kòrsou.

Sentro di Ekspertisia pa Prueba & Èksamen, un organisashon ehekutivo denter di ministerio di Enseñansa, ta responsabel pa e.o. konstrukshon, produkshon, distribushon i korekshon di e prueba final di Enseñansa di Fundeshi. E aña akí lo ta e di 9 biaha ku e prueba akí ta tuma lugá. E dianan ku e Prueba Final di Enseñansa di Fundeshi ta tuma lugá ta: 17, 18 i 19 di aprel 2018 i seguidamente dia 24 i 25 di aprel 2018. E dianan di repaso ta tuma lugá riba 3, 4, 7, 8 i 9 di mei 2018.

 

Kantidat di skol ku ta partisipá na e Prueba Final di Enseñansa di Fundeshi 2018

E aña akí na Kòrsou un total di 57 skol ku 89 klas ta partisipá na e Prueba Final di Enseñansa di Fundeshi 2018.

E alumnonan ku ta partisipá na e prueba final ta di diferente skol repartí bou di shete direktiva di skol regular i kuater privá.

 

E Prueba Final di Enseñansa di Fundeshi 2018 ku ta tèst tres materia tin un total di 270 item:

  1. Papiamentu tin 90 item repartí entre ortografia, vokabulario i teksto.
  2. Hulandes tin 90 item repartí entre spèlling (ortografia), woordenschat (vokabulario) i begrijpend lezen (teksto).
  3. Aritmétika/Matemátika tin 90 item repartí entre abilidat & operashon, midimentu, plaka, tempu & geometria i proporshon, frakshon, porshento & number ku kòma.

 

Pa tur parti di e prueba final ta usa pregunta di selekshon múltiple (multiple choice ku opshon di kontesta A-B-C-D).

E konstrukshon di e Prueba Final ta tuma lugá kuidadosamente i minusiosamente salí for di

kriterianan di kalidat. E Prueba Final ta basá riba e términonan final di Enseñansa di Fundeshi

stipulá pa minister di Enseñansa, Siensia, Kultura i Deporte.

 

Idioma di instrukshon hulandes òf papiamentu

Pa e parti di Aritmétika/Matemátika skol tin e opshon pa laga nan alumnonan traha e parti akí sea na hulandes òf na papiamentu, esaki dependiendo di e idioma di instrukshon ku e skol ta usa. Di e 1951 alumnonan na Kòrsou 1871 alumno ta traha e parti di Aritmétika/ Matemátika na hulandes i 80 alumnonan ta traha esaki na papiamentu. E 80 alumnonan ta repartí bou di 5 skol.

 

 

Resultado Prueba Final Enseñansa di Fundeshi

 

Sentro di Ekspertisia pa Prueba & Èksamen ta karga e responsabilidat pa konstrukshon,  produkshon, distribushon i korekshon di e Prueba Final di Enseñansa di Fundeshi i ta raportá na direktivanan di skol e resultado ku kada alumno a optené pa e prueba final.

 

Sinembargo, e konseho final tokante kontinuashon di enseñansa sekundario i e forma ku ta yega na e konseho akí ta prerogativa di direktivanan di skol.

 

Ta entregá e resultado di e Prueba Final di Enseñansa di Fundeshi  den e promé siman di yüni 2018 na direktivanan di skol.

ETE ta deseá tur alumno éksito ku nan Prueba Final di Enseñansa di Fundeshi.

Advertisements
error: Content is protected !!
%d bloggers like this: