Advertisements

Kampaña pa hóben ‘kon nos ta benefisiá?’ ta kulminá ku entrega di premio

Kampaña pa hóben ‘kon nos ta benefisiá?’ ta kulminá ku entrega di premio

 

WILLEMSTAD- Ministerio di Desaroyo Ekonómiko (MEO) a lansa e trayekto di komunikashon den kuadro di Kòrsou su Plan Nashonal di Desaroyo ku un kampaña interaktivo pa hóben. Hóbennan mester a krea un obra di arte, ekspresando kon nan lo benefisiá ku implementashon di Kòrsou su Plan Nashonal di Desaroyo. E kampaña aki a finalisá ku un entrega di premio na tur obra ganadó.

Un total di 13 obra a kompetí den 4 kategoria di e Plan Nashonal di Desaroyo: ekonomia, identidat nashonal, edukashon i durabilidat (ku enfoke riba medioambiente). Pa medio di e obranan aki, e hóbennan a ekspresá nan pensamentu i sentimentunan riba futuro di Kòrsou. E organisashonnan partisipante a dediká hopi atenshon na e obranan i e obranan ganadó a resultá e siguientenan.

Ekonomia: den e kategoria di ekonomia e obra ganadó a resultá CuraGreen app. E studiantenan di Kolegio Alejandro Paula a krea e obra aki ku e meta pa kontrarestá e situashon di fronteranan será entre Kòrsou i Venezuela. Nan ta mira potensial pa agrikultura serka kada siudadano i ta sugerí pa stimulá nos outosufisiensia i asina baha nos nivel di dependensia riba otro pais pa nos alimento, pa medio di un “mobile app”. E “mobile app” aki ta un plataforma ku ta ofresé informashon i konsientisashon tokante plantamentu. Riba e app aki por kumpra material pa planta, pero tambe simia. Alabes e app ta ofresé guia na e usuarionan, ku konseho i tep práktiko. Usuarionan por interkambiá tambe via e app.

Identidat nashonal: e obra ganadó a resultá un pintura di “Excel Arts Academy”. E pintura titulá ‘Balorá’ ta un proyekshon di tur loke ta representá nos kultura i nos patrimonionan nashonal, tantu material, komo no material. Ademas e obra ta kontemplá e kresementu ku ta tuma lugá segun nos ta krese den kon nos ta balorá nos propio identidat.

Edukashon: e obra ganadó den e kategoria aki ta un rèp. E rèp a keda trahá pa Excel Arts Academy i ta splika kon nan ta mira edukashon na aña 2030, e aña ku ta marka finalisashon di implementashon di e Plan Nashonal di Desaroyo. Enseñansa ku ta brinda posibilidat i edukashon i guia ta kas ta forma e liña kòrá den e obra musikal aki.

Durabilidat (medioambiente): e kategoria aki tabata e kategoria den kua mas obra a partisipá. E obra ganadó a resultá e obra titulá: Energia solar, un produkshon oudiovisual di St. Antonius scouting group. E vidio ta splika i mustra kon nos por uza energia solar na nos benefisio.

Sentro pa Detenshon i Korekshon Kòrsou tambe a gana un premio spesial. Nan a kompetí ku dos obra i e obra ganadó a resultá ‘Un gritu den desierto’. Esaki ta un pintura ku ta ilustrá kon edukashon por kibra kadenanan di enkarselashon.

Kada hóben partisipante a risibí un sertifikado di Gobièrnu di Kòrsou i United Nations Development Programme (UNDP). E hóbennan ku a krea un di e obranan ganadó a risibí un bale individual di ANG 100 pa gasta na un tienda di kòmpiuter òf na un “boekhandel” lokal. Kolegio Alejandro Paula tambe a risibí un premio èkstra di ANG 2.000, dor di nan esfuerso ekstraordinario pa a krea 8 obra di arte. Sentro di Detenshon i Korekshon Kòrsou tambe a risibí un obra ekstraordinario pa nan obranan kreá. Pa loke ta trata e obra ku a gana den kategoria di ekonomia, banda di e premio di ANG 2.000 ku tur organisashon ganadó ta risibí, e hóbennan ku a krea e app a gana un almuerso ku Minister di Desaroyo Ekonómiko, pa huntu ku nan kordinadó di grupo nan por interkambiá den un esfera ameno ku Minister.

MEO i tur otro ministerio partisipante ta ekstendé un pabien kaluroso na tur hóben ku a krea e obranan ganadó i tambe na tur kordinadó di grupo di e organisashonnan/skol respektivo. Ta analisando e posibilidat pa krea un eksposishon pa komunidat kompleto por atmirá e obranan. Pa awor esaki por riba e página di Facebook di Kòrsou Kapasitá: www.facebook.com/korsoukapasita/

Pa mas informashon por bishitá e página di Facebook di Kòrsou Kapasitá, e-mail MEO na info.meo@gobiernu.cw òf yama señora Gilian Martina, kordinadó di e kampaña na 516 30 12.

Advertisements
error: Content is protected !!
%d bloggers like this: