Advertisements

DEMOKRASIA NA PELIGER MP ke sa si Hulanda a duna MinPres instrukshon  

DEMOKRASIA NA PELIGER

MP ke sa si Hulanda a duna MinPres instrukshon

 

WILLEMSTAD – Tin tur indikashon ku Hulanda ta na punto di duna Gabinete Rhuggenaath un instrukshon pa e maneho finansiero aktual.

Fuentenan ta konfirmando ku partido MAN lo kita sosten for di Gabinete Rhuggenaath dado kaso ku CFT mester duna e Gobièrnu aktual un instrukshon pa ku e Maneho finansiero. Strategianan di eksperensha tras di e partido di koalishon MAN lo no ta dispuesto pa akseptá e instrukshon di Hulanda riba nan Minister di finansas.

Di otro banda, MP for di su fuentenan a komprondé ku si partido MAN kita sosten for di e aktual Gabinete, Minister presidènt Rhuggenaath ya kaba tin e sosten di polítika di Den Haag pa e disolvé Parlamentu i yama un elekshon nobo.

MP lo desaprobá e forma di hiba polítika aki i ta di opinion ku Gabinete Rhuggenaath kompleto mester asumí nan responsabilidat i bai hasi e trabou manera nan a primintí e pueblo di Kòrsou durante nan kampaña polítiko. Ta fresku den nos memoria kon partidonan PAR/MAN/PIN a konkluí rápidamente despues di elekshon di dia 28 di aprel ku nan ta esnan yamá pa dirigí e pueblo di Kòrsou. Anto awor ku e Gobièrnu di Hulanda ku a sostené PAR/MAN/PIN ta duna instrukshon kon pa atendé ku “nan sèn”,  gabinete di Rhuggenaath ke hui. Movementu Progresivo ta urgí e gabinete aktual pa karga nan responsabilidat pa loke nan ku a primintí pueblo di Kòrsou. E pueblo humilde aki no meresé e trato aki. Awor ta momentu pa bisti karson i dirigí Kòrsou i konvensé polítika Den Haag di boso akshonnan pa saka e pais aki dilanti.

Movementu Progresivo lo kondená kualkier forma di trapamentu di nos “demokrasia”. MP ta totalmente konvensí ku pueblo di Kòrsou ke mantené su Demokrasia intakto. Gabinete Rhuggenaath ta karesé di e lucha pa salvaguardá e outonomia den Reino ku pueblo di Kòrsou a skohe konsientemente pé. Ta aparentá ku di un forma sumiso Gabinete Rhuggenaath ta entregá outonomia di e pueblo di Kòrsou, ku tantu a lucha pe, den man di Hulanda.

Loke a tuma lugá na Statia, Aruba i na Boneiru no a pasa e pueblo di Kòrsou “voorbij”. E liña kòrá ta mustra ku awor Kòrsou ta na turno. Ta un malchi tin pa e Islanan Hulandes den Karibe. Grandinan ta bisa ora kas di bo bisiña ta na kandela kuminsá muha di bo.

Tin un diferensia. Miéntras Statia tabata tin un presupuesto aprobá pa e kolegio di supervishon finansiero di Reino tòg a invadí e isla aki i pone un ex-PARista na mando violando tur konsepto di demokrasia, bou di e preteksto di restourá òrdu. Aki na Kòrsou nos tin un presupuesto 2018 ku e Kolegio di supervishon finansiero di Reino, Cft, a manda bèk pa Gabinete Rhuggenaath adaptá e presupuesto. Cft a frakasá den su meta pa evitá ku Kòrsou lo akumulá un debe kuantioso. Supervishon i instrukshon no a kontribuí na progreso di nos nashon pero ta e lei di Cft aki mes Polítika Den Haag lo usa pa empobresé i kita mas outonomia for di pueblo di Kòrsou. Movementu Progresivo lo pidi un reunion pa pueblo por haña klaridat tokante di e peliger ku nos demokrasia na Kòrsou ta kore ku e Gabinete Rhuggenaath.

 

Movementu Progresivo

 

Advertisements
error: Content is protected !!
%d bloggers like this: