Advertisements

Minister Armin Konket: No ta aseptabel ku tin hende ku reibeweis sin a pasa eksámen ku éksito

Minister Armin Konket: No ta aseptabel ku tin hende ku reibeweis sin a pasa eksámen ku éksito

 

‘A konstatá fayo i a tuma e pasonan apropiá’

Ofisina di Reibeweis, debí na sierto fayonan di funshonamentu ku a sali na kla na 2013, a duna lisensia pa stür sierto kategorianan di vehíkulo na personanan ku no tabatin derecho riba tal reibeweis. Esaki, manera ta ampliamente konosí, a hasi investigashon atministrativo di parti di SOAB na e ofisina. A base di resultado di e investigashon aki a trese kambio den funshonamentu di Ofisina di Reibeweis i a pidi Landsrecherche pa hasi un investigashon pa mira si tabatin hende ku lo por ta kulpabel na violashon di lei. Landsrecherche a hasi su trabou i a pone e resultado den man di Ministerio Públiko. Gobièrnu ta pendiente di e desishon di Ministerio Públiko al respekto. Gobièrnu di su parti tin e obligashon pa koregí e situashon di hende ku ta kore rònt ku sierto reibeweis sin ku el a pasa e eksámen korespondiente.

‘No ta renobá reibeweis si biaha pasá no a pasa eksámen’

Minister Armin Konket, enkargá ku Ofisina di Reibeweis, a konsiderá nesesario pa duna instrukshon spesífiko na gerensia di Ofisina di Reibeweis. “Mi ta sostené e esfuerso ku Kranshi ta hasi pa mantené e reputashon di ta un organisashon konfiabel, responsabel i servisial. Kaminda hende ta traha por tin fayo. Pero, mester tuma paso pa limitá kosnan ku ta bai robes na un mínimo. Tambe mester koregí ora kos bai robes i sigur no ripití fayonan. P’esei mester evitá ku pa kualke deskuido ta renobá reibeweis di esnan ku biaha pasá a haña esaki sin ku nan a pasa eksámen. Dado kaso deskubrí ku un renobashon asina tòg a tuma lugá, anto lo tuma kontakto ku esnan konserní ya ku nan ta den posishon di un reibeweis riba kua nan no tin derecho”. Esaki ta un obligashon moral di Gobièrnu ya ku tur partisipante na tráfiko mester por konfia ku esnan ku tin reibeweis a haña esaki pa motibu ku nan a pasa eksámen ku éksito.

Kombatí korupshon ta klave den ‘Kòrsou Bon Sirbí’

Minister Armin Konket su empeño ta pa, ora mira bèk riba e periodo di gobernashon koriente, por komprobá ku el a aportá na un ‘Kòrsou Bon Sirbí’. “Un Kòrsou Bon Sirbí, na mi manera di mira, ta un Kòrsou kaminda kada un di nos ta duna su parti pa hasi Kòrsou un pais kada bes un tiki mas próspero i kaminda bienestar ta bati na porta di kada un di nos. Pa logra esaki ta importante pa kombatí tur kos ku ta deshonesto i ta kontribuí na korupshon”. Un Kòrsou Honesto ta un ‘Kòrsou Bon Sirbí’. Asina minister Armin Konket a bisa na final.

 

Advertisements
error: Content is protected !!
%d bloggers like this: