Advertisements

KOMUNIKASHON I PARTISIPASHON AKTIVO TA ESENSIAL PA PENSHUN

 

 

Eksitoso seminario asosiashon fondonan di penshun di Karibe Hulandes, CaPAs

 

KOMUNIKASHON I PARTISIPASHON AKTIVO TA ESENSIAL PA PENSHUN

 

WILLEMSTAD- Fondonan di penshun mester keda buska formanan simpel pa komuniká ku nan klientenan, esta e trahadónan ku ta spar pa nan penshun i tambe esnan ku ta kobra penshun kaba, pa embolbí nan mas tantu ku tópikonan relashoná ku penshun. Esaki tabata e liña kòrá durante di e di tres seminario di e asosiashon di fondonan di penshun di Karibe, CaPAs ku a tuma lugá reseientemente den Cinemark na Sambil. A keda enfatisá ku keda sin komuniká por resultá den  un riesgo adishonal.

 

Fondonan di penshun ta mei mei di komunidat tambe na momentu di kalamidat, asina sra. Evelyn Kruithof-Bor direktor di Fondo di Penshun General (APC) i alabes presidente di CaPAs a duna di konosé. E presidente di CaPAs a mustra su rèspèt i apresio pa e trahadónan di e fondo di penshun di Sint Maarten ku apesar di nan situashon personal, kaminda apesar di a sufri danjo na entre otro nan kas den orkan Irma, tòg nan a traha duru i pèrkurá pa pagonan di penshun tuma lugá na òrdu.

 

Tema dje di tres seminario di CaPAs tabata Komunikashon i Partisipashon. Komunikashon ta un tema ku nos tur sa di dje. Kon ku bai bin nos tur ta komuniká ku otro hinter dia. Pero dikon ta parse asina difísil pa logra interesá nos partisipantenan den nan penshun? Akaso e materia ta asina difísil òf tin otro faktornan ta hunga un ròl? E oradónan di òrdu Steven Schuit i Guus Wouters ta kompartí nan konosementu i ideanan riba e tema, asina sra. Kruithof-Bor a sigui splika.

 

Steven Schuit ta profesor Corporate Governance and Responsibility na Nyenrode Business Universiteit na Ulanda. E ta un profesor emérito na Universidat di Utrecht den International and Commercial law. E tin hopi aña di eksperensia den sektor privá komo gerente i komisario.

 

Guus Wouters ta un persona ku a dediká hinter su trayekto laboral den e área di seguridat sosial i a traha den sektor di penshun.  El a okupá vários funshon komo gerensia den diferente organisashon manera Pensioenfonds Metaal en Techniek. PMT ku un kapital di 70 miar euro i 1.3 mion partisipante, ta un di e fondonan di penshun di mas grandi di Ulanda.

 

No por forsa.

Tin un dicho ta bisa ku bo por hiba kabai te na boka di pos, pero bo no por oblig’é bebe.

Prof. Schuit a hasi un komparashon entre e dicho bieu aki i komunikashon den 2018. ‘Bo no por eksigí komunikashon, pero si bo por promové”, segun sr. Schuit. Bon komunikashon ta un abilidat, mester tin empatia, konosementu propio, pasenshi i eksperensia. Den esaki por topa ku frustrashon ora ku no ta haña oido apesar di a komuniká e informashon hopi bia kaba. Den komunikashon esun ku ta skucha mester ke risibí e informashon i tambe e mester por komprondé loke ta komuniká kuné. Segun Schuit, komunikashon efektivo ta sosodé di kurason pa kurason.

 

Guus Wouters a presentá un inventarisashon di posibel opshonnan komo solushon pa fondonan di penshun. Mas uso di komunikashon digital i simplifikashon di komunikashon pa logra mas komprondementu di e materia.

 

Ròl di regulado

Presidente interino di Banko Sentral sra. Leila Matroos-Lasten a elaborá riba e importansia di komunikashon i partisipashon pa un sistema di penshun duradero. Sra. Matroos-Lasten a mustra ku e sistema di penshun aktual ta bou di preshon debí na interes ku ta baha, oumentu di ekspektativa di bida, merkadonan finansiero no konsistente, embeyesimentu i poko posibilidat pa invertí lokalmente. Leinan aktual no ta pone eksigensia ku fondonan di penshun mester duna informashon obligatoriamente na e partisipante, Ulanda si a bai dilanti den esaki. Na opinion di e presidente interino tur hende mester tin e kurashi pa atmití ku penshun no ta algu sigur mas. Partisipantenan mester haña informashon kla tokante e riesgonan mará na sparmentu pa penshun.

 

Partisipashon den fondo di penshun

Segun sra. Evelyn Kruithof-Bor, sektor di penshun tin masha deseo pa habitantenan di Karibe Ulandes tin mas partisipashon den e sistema di penshun i ku nan ta atkerí un penshun komplementario banda di e AOV ku nan ta risibí di gobièrnu. E meta di promové mihó komunikashon ta laga e partisipantenan sa mas kiko penshun ta kome i bebe. Esei ta importante pa asina nan ta na altura kiko nan por spera di bai kobra den futuro i si esei ta sufisiente pa nan sigui biba di dje. A lanta CaPAs na 2015 ku e meta pa salbaguardiá interes di  sektor di penshun den Karibe Ulandes i tambe pa promové koperashon entre e fondonan di penshun. Partisipashon di mas fondo ta di gran balor. ‘Huntu nos ta para mas fuerte i ta siña for di otro”. Sra. Kruithof-Bor a enfatisá ku penshun ta haña e atenshon di partisipantenan na momentu ku fondonan di penshun duna informashon transparente i embolbí su partisipantenan. Solamente asina e partisipantenan lo realisá kon importante nan penshun ta pa nan futuro.

 

Advertisements
error: Content is protected !!
%d bloggers like this: