Advertisements

BAN NOS TUR BAN KONTRIBUÍ NA  UN TRÁFIKO MAS SIGUR

BAN NOS TUR BAN KONTRIBUÍ NA  UN TRÁFIKO MAS SIGUR

 

Willemstad –  Minister di Tráfiko, Transporte i Planifikashon Urbano Zita Jesus Leito enkargá ku e Servisio di Tráfiko i Transporte ta urgí tur hende pa e dianan aki bai ku mas koutela den tráfiko.

 

E dianan liber akí ta karakterisá pa hopi mas moveshon ku kustumber den nos tráfiko. Hopi hende ta bai kamper  na e diferente playanan, di Banda Ariba te Banda Bou. Pa hasi e estadia di e bishitantenan  na e diferente playanan mas sigur posibel, un tim multidisiplinario ku ta konsisti di entre otro Polis, Wardakosta, OW, ROP, Selikor, Brandweer i Fundashon Ambulance a tuma algun medida di prekoushon. Outoridatnan polisial tambe lo realisá kontròlnan severo riba nos kareteranan. Nos mes, komo komunidat, por kumpli ku regla pa por transita riba e kareteranan di Korsou i aporta na un trafiko mas sigur. Pues ora subi kaya kumpli ku regla di tráfiko, no kore iresponsabel, no kore ku velosidat haltu, no stür bou di influensha di alkohòl of otro substansha, i bisti bo faha di seguridat. Korda kontrola ku bo papel di kùr, seguro di outo i belasting di outo ta na òrdu.

Na mes momento Minister Zita Jesus Leito ta informá ku e ekspertonan di tráfiko ku a bishita e bolsa di Intertraffic na Ulanda por  a tuma nota di diferente aspekto pa loke ta un tráfiko mas sigur. Entre otro nan a haña informashon  riba bòrchinan di tráfiko fleksibel, vangrailnan duradero i mas sigur, chipnan ku ta pone den plachi number, kámaranan inteligente, importansha di markamentu di kaminda, i produktonan nobo pa hasi kayanan mas sigur.

Ta asina ku e team a presensia algun presentashon interesante miéntras ku a hasi algun palabrashon manera entre otro e posibilidat pa Verkeer Kenniscentrum di Ulanda bishita Kòrsou anualmente pa duna training i kursonan riba seguridat den tráfiko.

Ta hopi importante pa komunidat ta konsiente di un tráfiko sigur.  P’esei tambe señora Zita Jesus Leito komo Minister di Tráfiko ta hasi un apelashon hopi serio na komunidat pa move ku koutela den tráfiko i kumpli ku reglanan di trafiko pa asina nos por tin un tráfiko mas sigur.

Pa mas informashon por tuma kontakto via e number +5999465-1477. Tambe por manda Whats app na number di telefòn +5999511-8582 òf por manda e-mail na info.rop@gobiernu.cw.

Advertisements
error: Content is protected !!
%d bloggers like this: