Advertisements

Kas, Klas i Kaya mester ta den harmonia

Kas, Klas i Kaya mester ta den harmonia

 

WILLEMSTAD – Durante e konferensia di “Gender Equality: Inclusion and Unity” ku a keda organisá resientemente dor di UNESCO Kòrsou, sr. Johan Oldenboom, sosiólogo a trese un presentashon ku a hala hopi atenshon.

Sr. Johan Oldenboom a elaborá tokante género i e influensha di Kas, Klas i Kaya riba nos hóbennan na Kòrsou. Sr. Johan Oldenboom a referí na e teoria di triángulo di sr. Ilias El Hadioui (sosiólogo na Universidat Erasmus Rotterdam), kaminda e tres kulturanan di “Kas, Klas i Kaya” mester ta den harmonia pa asina muchanan lanta di un manera balansá. Di e manera aki por krea siudadanonan i un sosiedat sano. Por konstatá ku aktualmente tin un desbalansé den e aspektonan aki na Kòrsou.

E ròl di hende muhé den famia i den Kas na Kòrsou ta sumamente importante, segun e análisis ku a keda hasí. E hende muhé den mayoria kaso ta esun ku ta kuida i eduká e yunan. Di e forma aki e hende muhé ta esun ku ta tuma un posishon sentral den e kas di famia i e tata mayoria biaha ta kai den un posishon marginal.

Segun investigashonnan por konstatá ku e kultura den enseñansa na Kòrsou ta un kultura femenino. Banda ku e sistema di enseñansa ta hopi dirigí riba mucha muhé, tambe tin tiki hende hòmber den enseñansa pa fungi komo ehèmpelnan maskulino. Di e forma aki por bisa ku e influensha di e hende muhé den enseñansa ta relativamente grandi na Kòrsou. Na Kas i den Klas e kultura femenino ta dominá.

Den kuadro di e aspekto di “Kaya” por mira den médionan sosial i videoclip di artistanan internashonal i di Kòrsou, e imágen di machismo ku ta bini ku frekuensia dilanti. Esaki ta e imágen kaminda e hende hòmber ta keda rondoná pa di diferente hende muhenan bistí ku pañanan probokativo i ku ta sirbi’é. Esaki ta nifiká ku e hòmber tin un posishon di poder riba e muhé. Kaya ta mustra di ta maskulino.

Mirando sifranan, Klas ta dunando Kaya e hende muhé ku ta sirbi. Banda di esaki tin tiki ehèmpel maskulino na Kas i den Klas pa e mucha hòmbernan. Kaya ta yenando e bashí i ta dunando pues e ehèmpel di ku e hòmber mester tin poder riba e muhé.

Sr. Johan Oldenboom su konseho ta pa buska union entre Kas i Klas. Na su turno ta importante pa Kas i Klas buska e diálogo tokante Kaya i si por ku Kaya. Den kuadro di esaki mester hasi e hóbennan konsiente di Kaya i empoderá nan pa nan ta positivo.

Ta importante pa krea un balansa den Kas, Klas i Kaya, kaminda e diferensianan entre género ta den harmonia. Di e forma aki nos hóbennan por risibí un edukashon i formashon sano i den balansa, kual ta fundeshi pa desaroyo di nos sosiedat.

Advertisements
error: Content is protected !!
%d bloggers like this: