Advertisements

NOS SELEKSHON NASHONAL A TOPA BOLIVIA 23 I 26 DI MART ÚLTIMO DURANTE 2 PARTIDO AMISTOSO! KÒRSOU DANKI!

NOS SELEKSHON NASHONAL A TOPA BOLIVIA 23 I 26 DI MART ÚLTIMO DURANTE 2 PARTIDO AMISTOSO!

KÒRSOU DANKI!

Ayera, djaluna 26 di mart, meskos ku djabièrnè 23 di mart último, un gran públiko a disfrutá di 2 tremendo partido entre nos selekshon nashonal i e selekshon di Bolivia. Manera ya ta konosí durante nos promé enkuentro, Gino van Kessel a anotá e gol di nos selekshon i mas despues e partido a empatá ku un outogol di Darryl Lachman pa finalisá ku e skor di 1-1. Ayera si nos a logra e viktoria ora ku Leandro Bacuna a kobra un pinalti i a anotá e úniko gol di e partido di kual nos a sali viktorioso.

Ayera atrobe e públiko presente a disfrutá di un dushi ambiente promé i durante pousa ku animashon musikal di grupo rítmiko Orírí miéntras Roald Balentien tabata esun enkargá pa kanta nos himno. Apesar di algun konfrontashon riba tereno tur hende a disfrutá di otro gran partido i na final fanátikonan a selebrá nos triunfo i a probechá pa saludá i saka potrèt ku e hungadónan di nos selekshon.

Despues di e partidonan aki nos selekshon lo bolbe mira akshon na luna di sèptèmber próksimo ora ku nos topa Grenada durante e kalendario di FIFA den e CONCAF Nations League su partidonan di kualifikashon. E partido aki lo tuma lugá aki na Kòrsou miéntras nos lo mester enfrentá Virgin Islands na Virgin Islands den luna di òktober pa despues hunga nos terser ronda di partido na Kòrsou kontra Guadeloupe den luna di novèmber i na mart 2019 enfrentá Antigua na Antigua. Tur esaki nan durante e kalendario di FIFA. Pues tin diferente kompromiso importane ta warda nos selekshon nashonal den e CONCACAF Nations League.

Un danki ta bai na henter pueblo di Kòrsou pa e gran sosten ku nan a brinda nos selekshon durante e promé i tambe e segundo partido kontra Bolivia. Boso apoyo tabata esensial pa logra e viktoria kontra Bolivia.

Un danki tambe ta bai na nos spònser nan; FIFA, FDOK, RDK i gobièrnu di Kòrsou pa boso koperashon. Prensa di Kòrsou, e gran públiko ku a asistí na ámbos partido i tur ku a yuda di un òf otro manera pa engrandesé e evento aki, danki! Sin boso yudansa e partidonan aki lo no tabata posibel.

Pasa buska di bo pa asina bo ta kla prepará pa e regreso di nos selekshon nashonal na sèptèmber próksimo durante nos enkuentro ku Grenada den e CONCACAF Nations League aki na Kòrsou!

Advertisements
error: Content is protected !!
%d bloggers like this: